Balalarǵa arnalǵan is-sharalarda olardyń qaýipsizdigine kepildik berilýi tıis - Smaıylov

NUR-SULTAN. QazAqparat – Balalar qatysatyn kez kelgen is-sharany uıymdastyrý olardyń qaýipsizdigine kepildik berýi tıis. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Balalardyń bilim alyp, jan-jaqty damýyna, demalysy men medıtsınalyq qyzmet alýyna jaǵdaı jasaý – memlekettiń mańyzdy mindeti. Biz júzdegen mektep, bala-baqsha men mádenı jáne sport nysandaryn salyp jatyrmyz. Munyń barlyǵy balalardyń tolyqqandy damýy úshin qajet.

Sondaı-aq Balalar jyly aıasynda bıyl kóptegen keshendi is-shara josparlanyp otyr. Búgin Almatyda Memleket basshysy Balalar jylynyń qurmetine shyǵarmashylyq, zııatkerlik jáne sporttyq baıqaýlardyń jeńimpazdary men laýreattary 30 myń oqýshynyń qatysýymen «Almaty – fest» festıvalin ashady. Barlyq óńirde balalarǵa arnalǵan merekelik is-sharalar bastalady», - dedi Úkimet basshysy.

Álıhan Smaıylov Balalar jylynyń barlyq is-sharalary naqty oryndalýy tıistigin basa aıtty.

Balalardy qorǵaý kúni qashan da jazǵy saýyqtyrý naýqanynyń bastamasy bolǵan. Ol úshin Densaýlyq saqtaý mınıstrligi qolaıly jaz mezgilin barynsha tıimdi paıdalanyp, keshendi sharalardy qabyldaý kerek. Balalardyń jazǵy demalysy men bos ýaqytyn tıimdi uıymdastyrý kezinde kóptegen mańyzdy jáne negizgi jaıttardy eskerý qajet. Eń bastysy – kóshede, sýda demalý kezinde, túrli ekskýrsııalarda balalarymyzdyń qaýipsizdigin qamtamasyz etý qajet», - dedi ol.

Premer-Mınıstrdiń atap ótýinshe, balalar qatysatyn kez kelgen is-sharany uıymdastyrý, eń aldymen, olardyń qaýipsizdigine kepildik berýi tıis.

«Іshki ister, Bilim jáne Densaýlyq saqtaý mınıstrlikteri, óńir ákimderi tıisti qyzmetterdiń jumysyn osyǵan jumyldyrýy kerek. Sonymen birge oqý oryndaryn qaýipsizdik júıesimen jaraqtandyrý jáne jańǵyrtý jumystaryn jandandyrý qajet», - dedi Álıhan Smaıylov.