Balalarǵa arnalǵan ınsýlın quraly bıýdjet qarajatyna satyp alynatyn boldy
Bunyń aldynda, qant dıabetine shaldyqqan balalardyń ata-analary men qoǵamdyq uıymdar «ınsýlın pompalaryn satyp alýda memlekettik kómek toqtatyldy» dep shý kótergen bolatyn.
«Pompa degenimiz - qanǵa ınsýlın jiberip turatyn arnaıy qural, ol 1-18 jasqa deıin qoldanylady. Sol pompalarmen qamtamasyz etý jaǵy qıyndaý bolǵan edi. Qazir ol másele sheshildi. Biz bul problemany sheshtik. Prezıdent apparatyna, Darıǵa Nazarbaevaǵa (QR Premer-Mınıstriniń burynǵy orynbasary - red.), Ádilbek Jaqsybekovke (QR Prezıdent Ákimshiliginiń basshysy - red.) jazdyq. Olar Densaýlyq saqtaý mınıstrligine yqpal etip, qazir bizdiń ótinish qanaǵattandyryldy. Barlyǵyn burynǵydaı qaldyrdy. Balalar úshin pompalar jetkiziletin boldy. Bul másele túbegeıli sheshilip otyr. Aldyńǵy kúni Densaýlyq saqtaý jáne áleýmettik damý vıtse-mınıstr Alekseı Tsoıdan barlyǵy memlekettik bıýdjet aıasynda qaldyrylǵandyǵy týraly aqparatty aldym. Búgin bizde mundaı másele endi joq», - dep atap ótti L. Jubandyqova.
Qaýymdastyq basshysynyń sózinshe, Qazaqstan boıynsha, atalǵan pompalarǵa 2 400 adam muqtaj. Qazirgi kezde 1 450 adam pompamen qamtylyp otyr. Qamtý deńgeıi - 60 paıyz. Qalǵandarynda pompalar kelmegen nemese óz erikterimen bas tartqandar. Sebebi bul qurylǵyny alý nemese almaý adamnyń jeke tańdaýy.
Onyń aıtýynsha, salaýatty ómir salty, durys tamaqtaný, dene shynyqtyrý degen uǵymdardy adamdardyń jat kórýi naýqastar sanynyń artýyna sebep bolyp otyr.
«Jyl saıyn Qazaqstanda dıabetke shaldyǵatyndar sany 6 paıyzǵa ósip otyrady. Qazirgi ýaqytta bul dert jasaryp barady. Ekinshi tıpti qant dıabeti balalar men jasóspirimderde beleń alýda. Ekinshi tıp - degenimiz qant deńgeıiniń semizdik kesirinen joǵarylaýy. Bul negizinen durys tamaqtanbaý, salaýatty ómir saltyn durys ustanbaý, onyń ústine balalar kúni boıy kompıýter aldynda otyrady, fast-fýd pen koka-kolany kóp tutynady. Nátıjesi osyndaı dertterge ákeledi», - deıdi ol.