Balalarǵa arnalǵan aqparattardy jas sanattaryna sáıkes tańbalaý mindetteledi - A.Smaıyl
ASTANA. QazAqparat - Búgin Parlament Májilisiniń jalpy otyrysynda «Balalardy densaýlyǵy men damýyna zııan tıgizetin aqparattan qorǵaý týraly» zań jobasyn ekinshi oqylymda maquldady. Toqtala ketetin jaıt, zań jobasyna palatanyń birqatar depýtattary bastamashy boldy jáne qujat memlekettik tilde jazylǵan.
Qujat halyqaralyq quqyqtyń balalardyń aqparattyq qaýipsizdigin qamtamasyz etýge baǵyttalǵan. Onyń ishinde Qazaqstan qabyldaǵan BUU-nyń Bala quqyqtary týraly Konventsııasynda bekitilgen, jalpyǵa tanylǵan qaǵıdattary men normalaryna sáıkes bala quqyqtaryn qorǵaýdy basymdyqpen qamtamasyz etý qajettiligi negizge alyna otyryp ázirlengen. Al bastamashylar zańdy qabyldaýdyń ózektiligin balalardyń álsiz topqa aınalýymen túsindiredi. Olar jańa aqparattyq tehnologııalardyń qarqyndy damýymen (Internet, uıaly jáne basqa da baılanys túrleri, tsıfrlyq habar taratý) aqparattyń teris yqpal etýine ushyrap otyr. Jarnama óniminiń aınalymy, elektrondyq jáne kompıýterlik oıyndar, kıno, beıne, ózge de aýdıovızýaldyq habarlamalar men materıaldar aınalymy kezinde BAQ, ortaq paıdalanylatyn aqparattyq-telekommýnıkatsııalyq jelilerdi paıdalana otyryp taratylatyn aqparat, kóbinese balalarǵa psıhıkalyq keri áser etip, agressııaǵa, qatygezdikke, qoǵamǵa qarsy áreketterge ıtermeleıdi. Sondyqtan jaǵdaıdyń osylaısha qalyptasýyna aqparattyq ónimniń aınalymy kezinde balalardyń ımandylyǵy men densaýlyǵyn qorǵaýdy qamtamasyz etýdiń quqyqtyq kepildikterin zańnamalyq retteý turǵysynan edáýir olqylyqtar áserin tıgizip otyr.
Osylardy sheshý maqsatynda zań jobasynda balalardyń psıhofızıologııalyq erekshelikterin eskere otyryp, ár túrli jas toptaryndaǵy balalarǵa arnalǵan aqparattyq ónimniń mazmunyna qoıylatyn arnaıy talaptardy bekitý kózdeledi. Máselen, aqparattyq ónimniń jas sanattary belgilenedi, solardyń negizinde «-6», «+6», «+12» «+16» jáne «+18» sekildi jas sanaty belgisi beriletin bolady. Bul rette, árbir jas sanaty boıynsha osy jas sanattaryna tán krıterııler aıqyndalyp otyr. Budan bólek, balalarǵa arnalǵan aqparat óniminiń aınalymyna qoıylatyn arnaıy talaptar da zań júzinde engizildi.
«Tutastaı alǵanda, zań jobasynda balalardyń densaýlyǵy men damýyna zııanyn tıgizetin aqparattyń túrleri anyqtalyp, balalardyń jas sanattary belgilendi, olardyń aqparatty qabyldaý erekshelikteri eskerildi. Balalarǵa arnalǵan aqparattardy jas sanattaryna sáıkes, tańbalaý mindettelip otyr», - dedi depýtat Aldan Smaıyl.
Májilis maquldaǵan zań jobasy Parlament Senatyna joldanady.
