Balalarǵa arnalǵan ádebı shyǵarmalardyń nátıjesi jarııalandy
LMATY. Mamyrdyń 13-i. QazAqparat /Názıra Eleýhan/ - Almatyda bıyl osymen 4-ret «ZHERSU» korporatsııasy men Qazaqstan Jazýshylar odaǵynyń uıymdastyrýymen ótkizilip kele jatqan dástúrli «Daraboz» halyqaralyq baıqaýynyń qorytyndy nátıjesi jarııalanyp, jeńimpazdar marapattaldy, dep habarlaıdy QazAqparat.
Báıge 2009 jyly qyrkúıek aıynda bastalyp, sáýirdiń 20-synda aıaqtaldy. Baıqaý sharty boıynsha oǵan 1-8 synyp oqýshylaryna arnalǵan prozalyq, poezııalyq jáne dramalyq shyǵarmalar qabyldanǵan. Balalardy qorǵaý kúni qarsańyna oraılastyrylyp uıymdastyrylǵan baıqaýdyń bas báıgesine 350 myń teńge, 2 birinshi orynǵa (170 myńnan), 2 ekinshi orynǵa (80 myńnan), 3 úshinshi orynǵa (50 myńnan) jáne yntalandyrý syılyqtary (36 myńnan) taǵaıyndalǵan bolatyn.
Qazylar alqasynyń aıtýynsha, myńnan tulpar, júzden júırikti tańdap alý ońaı bolmapty. Degenmen, baıqaý bolǵandyqtan, naǵyz balalar kózaıymy bolarlyq tańdaýly shyǵarmalar iriktelgen. Sonymen, qorytyndy nátıjesi boıynsha báıgeniń Bas júldesin - aqyn, Qastek Baıanbaıdyń "Egizder" óleńder jınaǵy enshiledi. Birinshi 2 báıgeniń bireýin aqyn, Ábýbákir Qaırannyń "Mezgil mezet mektebi" shyǵarmasy, al ekinshisin "Bıbijar men boıtumar" atty Baıan Bolathanovanyń povesi ıemdense, ekinshi eki báıgege "Jetisý" gazetiniń redaktory Jaqypjan Nurǵojaevtiń "Altyn sheke" degen shyǵarmasy men "Ekinshi úıim qazynam" atty Aqtóbe qalasynyń turǵyny Ertaı Ashyqbaevtiń óleńder toptamasy laıyq dep tanyldy. Úshinshi úsh báıge - «Saıatker» laqap atynyń avtory Turdaqyn Jeksenbaıǵa, Dildar Mamyrbaevanyń «Mahabattyń aq jaýyny» povesine jáne «Aq ulpa sezim, aqshaqar» povesiniń avtory, «Aq jelken» jýrnalynyń redaktory Nurǵalı Orazǵa berilse, yntalandyrý syılyqtarynyń qurmet-iltıpatyna «Úsh taǵan» atty shyǵarmanyń avtory Gúljan Ábırova, «Tuńǵysh temir jol vokzaly» povesiniń ıesi Álibek Baıbolov, «Yrys aldy yntymaq, halqymnyń qadir qasıeti» pesasy úshin Qanat Qaıym jáne «Bórili saıdyń bóltirikteri» atty pesasy úshin Álibek Faızullauly bólendi.
Jeńimpazdardyń barlyǵy aqshalaı syılyqtarmen qatar, arnaıy dıplomdarmen marapattaldy.
Baıqaýdyń ótýine uıtqy bolǵan jazýshy, «Alash» syılyǵynyń ıegeri, «Balapan álemi» jýrnalynyń redaktory Sháken Kúmisbaıulynyń aıtýynsha, baıqaýǵa 125 hat, 446 shyǵarma kelip túsken.
Balalar aqyny, Qazaqstan Jazýshylar odaǵy balalar ádebıeti keńesiniń jetekshisi Sultan Qalıulynyń aıtýynsha, Almatyda balalar ádebıetin qoldaýǵa baılanysty qala ákimdiginiń, til basqarmasynyń, mádenıet mınıstrliginiń baıqaýlary jylma-jyl báıge jarııalap keledi. "Biraq báribir bedeli jaǵynan «Daraboz» báıgesine jete almaı júr. Onyń báıgege bólgen qarjysy mol. Jáne dástúrli báıgege aınalyp otyr. Bul baıqaý balalar jazýshylaryna qoldaý kórsetetin sharaǵa, sonymen qatar balalar tárbıesine úlken úles qosatyn, rýhanı baılyq beretin ıgi sharaǵa aınaldy. Mine, sońǵy jylda báıge jeńimpazdarynyń shyǵarmalarynan «Káýsar bulaqtyń» 3-kitaby shyǵarylyp, oqýshylarǵa tegin taratylyp keledi. Osy «Darabozdyń» arqasynda balalarǵa arnalǵan qanshama jańa dúnıe týdy, qanshama qalamger syılyqtarǵa ıe boldy", dep atap ótti Sultan Qalıuly.
Baıqaýdyń demeýshisi, «ZHERSU» ınvestıtsııalyq-óndiristik korparatsııasynyń basshysy Baýyrjan Ospanovtyń aıtýynsha, búgingi jeńimpazdardyń shyǵarmalary jáne buǵan deıin «Káýsar bulaq" degen atpen shyqqan kitaptardy bolashaqta orys tiline jáne aǵylshyn tiline aýdarý josparlanyp otyr. "Sonymen qatar, baıqaýǵa kelip túsken shyǵarmalarǵa kıno túsirýdi, qoıylymdar qoıýdy josparlap otyrmyz jáne aldaǵy ýaqytta baıqaýdyń arnaıy saıtyn ashýdy oılastyrýdamyz. Saıtqa hat jazýshylardyń baıqaý týraly pikiri jaqsy bolsa, baıqaý bıýdjetin 10 mıllıonǵa deıin ósirýge ýáde beremin", dedi ol.
Uıymdastyrýshylardyń aıtýynsha, bıyl da júlde alǵan úzdik shyǵarmalar «Káýsar bulaq» degen atpen kitap bolyp shyǵyp, respýblıkadaǵy barlyq bilim berý mekemelerine tegin taratylatyn bolady.
