Balalarǵa áleýmettik jelilerge tyıym salatyn normalar Quryltaıda qaralady
ASTANA. KAZINFORM – Elimizde balalardyń onlaın platformalardy paıdalanýyn retteıtin normalar pysyqtalyp jatyr. Zań jobasy depýtattardyń qaraýyna Quryltaıdyń jańa sıssııasy bastalǵanda shyǵarylady. Bul týraly Mádenıet jáne aqparat vıtse-mınıstri Evgenıı Kochetov málim etti.
— Onda 16 jasqa deıingi balalarǵa tirkeýden ótýge shekteý bolady degen norma bar. Jańa tetikterdi ádeıi zańǵa engizip jatyrmyz. Bul qadamdar qazir memlekettik organdarmen birge talqylanyp jatyr. Bul qujat áli Parlamentke engizilgen joq, - dedi E. Kochetov Parlament palatalarynyń birlesken otyrysynan keıin tilshiler suraǵyna jaýap bere otyryp.
Mınıstrlik ázirlegen usynystardyń ishinde onlaın koýchterdiń jumysyn retteıtin normalar da bar.
Kochetovtiń aıtýynsha, keıingi jyldary Eýropanyń kóptegen elinde balalardyń áleýmettik jelilerdi paıdalanýyna tyıym salatyn zańnamalyq ózgerister pysyqtalyp jatyr. Mundaı shekteýler Avstralııada da kúshine endi.
— Birqatar eýropalyq elde qazir osy saladaǵy zańnama qaıta qaralyp jatyr. Jalpy, Eýroparlament muny ulttyq zańnamaǵa engizýdi usyndy. Atap aıtqanda, bul normanyń qajet ekenine senimdimiz, - dedi vıtse-mınıstr.
Qazir mınıstrlik túzetýler jobasyn basqa memlekettik organdarmen kelisip jatyr.
— Jańa normalar Úkimet qaraýynda. Endi osy normalardy Quryltaı alańynda talqylaımyz», - dedi Kochetov.
Aıta keteıik, jyl basynda áleýmettik jelige kirýshilerdi jasyna qaraı shekteıtin zań jobasy talqylaýǵa shyǵarylǵany málim boldy.
Buǵan deıin elimizde Quryltaı týraly zań qabyldanǵanyn jazǵan edik.
