Balalardyń jol-kólik apatyna túsý oqıǵalarynyń 80 paıyzyna júrgizýshiler kináli - ІІM
ASTANA. QazAqparat - Balalardyń jol-kólik apatyna túsetin oqıǵalarynyń 80 paıyzyna júrgizýshiler kináli. Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda Іshki ister mınıstrligi Ákimshilik polıtsııa komıtetiniń tóraǵasy Igor Lepeha málim etti.
Komıtet basshysynyń keltirgen málimetterine qaraǵanda, 2014 jyly jol-kólik oqıǵalarynan kámeletke tolmaǵan 142 bala qaza taýyp, 2 163 bala jaraqat alǵan.
«Balalardyń kinásinen oryn alatyn jol-kólik apatynyń negizgi sebepteri - bul, birinshi kezekte belgilenbegen oryndarda joldardy kesip ótý, kólik quraldarynyń aldynan júgirip shyǵý, sondaı-aq jol boıynda oıyndar oınaý bolyp tabylady. Degenmen balalardyń jol-kólik apatyna túsetin oqıǵalarynyń basym bóligi, naqtylasaq, 80 paıyzǵa jýyǵy kólik quraldary júrgizýshileriniń kinásinen, al árbir besinshi jol-kólik apaty sol jas jetkinshekterdiń óz kinásinen oryn alyp jatyr», - deıdi I.Lepeha.
Osyǵan baılanysty komıtet tóraǵasy qazirgi tańda elimizde jol qozǵalysy qaýipsizdigin qamtamasyz etý máseleleri joǵary deńgeıde qarastyrylatynyn málim etti. Atap aıtqanda, aǵymdaǵy jyly «Jol júrisi týraly» zań qabyldanyp, onda jol júrý erejelerin óreskel buzýshylyqtarǵa qoldanylatyn sharalar qatańdatylǵan.
«Jalpy, jol qaýipsizdigi salasynda qalyptasqan jaǵdaıdyń eki basty sebebi bar. Bular: jol qozǵalysyna qatysýshylardyń tártibiniń tym tómendigi, ekinshiden, elimizde avtokólikter sanynyń kúrt artýy. Avtoparkter sanynyń ósýi apattylyq deńgeıine shynynda da áser etpeı qoımaıdy, óıtkeni kólik artqanymen, joldarymyz áli burynǵy kúıinshe qalyp otyr», - deıdi ol.
