Balalardyń jazǵy lagerine qandaı talaptar qoıylady
Densaýlyq saqtaý mınıstrligi kanıkýl kezeńinde balalardyń saýyqtyrý demalysyn, bos ýaqytyn jáne jumyspen qamtylýyn uıymdastyrýda medıtsınalyq qyzmet kórsetý boıynsha jergilikti atqarýshy organdardy úılestirýdi, saýyqtyrý mekemelerinde balalardyń jaǵdaıynyń qaýipsizdigine sanıtarııalyq-epıdemıologııalyq baqylaýdy uıymdastyrady.
«Ákimdikterdiń málimetinshe, bıyl jazǵy maýsymda 12 myńǵa jýyq lager, onyń ishinde 11 myńnan astam mektep janyndaǵy lager, 236-ǵa jýyq qala syrtyndaǵy saýyqtyrý lagerin ashý josparlanýda, onda 1 mln 600 myńnan astam bala demalady. Medıtsınalyq-sanıtarııalyq alǵashqy kómek deńgeıinde balalardy medıtsınalyq tekserý, onyń ishinde ımmýndyq statýsy, densaýlyq jaǵdaıy týraly anyqtamalar berý, ınfektsııalyq naýqastarmen baılanysy joqtyǵyn tekserý uıymdastyrylady», - dedi mınıstr Úkimet otyrysynda.
Onyń aıtýynsha, qala mańyndaǵy lagerlerde 400-ge jýyq medıtsına qyzmetkeri medıtsınalyq kómek kórsetedi.
Sondaı-aq, saýyqtyrý mekemelerine qoıylatyn negizgi talaptar da bar.
«Balalar kelgenshe barlyq qala syrtyndaǵy lagerler sanıtarııalyq-epıdemıologııalyq talaptarǵa sáıkestigin rastaıtyn sanıtarııalyq-epıdemıologııalyq qorytyndy alýǵa mindetti. Tamaq daıyndaý jáne tamaqtaný sharttary men qaýipsizdigi, sý qoımalary men basseınderdi qosa alǵanda, turý jáne demalý jaǵdaılary, aýyz sý qaýipsizdigi tekseriledi. Aýmaq pen úı-jaılar kemirgishterge, jándikterge, kenelerge jáne qan sorǵyshtarǵa qarsy tazartylýy kerek», - dep túsindirdi A. Ǵınııat.
Sanıtarııalyq-epıdemıologııalyq qorytyndy bolmaǵan kezde balalardy qala syrtyndaǵy lagerlerge qabyldaýǵa jol berilmeıdi.
«Jazǵy lagerdi tańdaý kezinde ata-ananyń áreketteri asa mańyzdy. Ata-analarǵa mınıstrlik saıtynda, sondaı-aq Sanıtarııalyq-epıdemıologııalyq baqylaý komıtetiniń jáne onyń aýmaqtyq departamentteriniń saıttarynda qorytyndy alǵan qala syrtyndaǵy lagerler týraly aqparatty paıdalanýdy usynamyz. Suraqtar týyndaǵan jaǵdaıda jedel jeli telefonyna habarlasýǵa bolady», - dedi Densaýlyq saqtaý mınıstri.
