Balalardyń jazǵy lagerde demalý quny qansha

ASTANA. QazAqparat – Elimizde balalardyń jazǵy lagerlerde 1-2 apta demalý quny 80 myń teńgeden bastalyp, 240 myń teńgege deıin jetedi, dep habarlaıdy QazAqparat tilshisi.

Energyprom.kz portalynyń málimetinshe, kishkentaı qazaqstandyqtar úshin qala syrtyndaǵy ortalyqtardaǵy jazǵy týrıstik demalystyń quny óńirlerge qaraı árqıly. Bul aýysym uzaqtyǵyna (7, 10, 12 kún), maýsymǵa (jazdyń sońynda baǵa tómenirek), uıymnyń profıline, mártebesine sııaqty kóptegen faktorǵa baılanysty. Máselen, Shymkent irgesindegi Delve Camp aǵylshyn lagerinde turý 159 myń teńgege deıin jetedi. Al óńirlerdegi standartty týrıstik balalar ortalyqtaryndaǵy ortasha baǵa 80-100 myń teńgeni quraıdy.

Eń qymbaty – «Baldáýren» respýblıkalyq oqý-saýyqtyrý ortalyǵy. Ol barlyq basqa lagerler arasynda aýqymy jaǵynan da, qyzmet kórsetý sapasy jaǵynan da erekshelenedi. Onda balalar saýyqtyrý jáne reabılıtatsııadan ótedi. Joldamalardy Oqý-aǵartý mınıstrligi birinshi kezekte daryndy balalarǵa, jetim balalarǵa, erekshe bilim berýdi qajet etetin balalarǵa, az qamtylǵan otbasylardan shyqqan mektep oqýshylaryna taratady. Ol jerge balany kommertsııalyq negizde jiberý úshin 15 kúndik aýysymǵa 240 myń teńge tóleý kerek. Bul – Qapshaǵaı sý qoımasynyń jaǵalaýynda, Qonaevta ornalasqan «Baldáýren» bólimshesine bılettiń baǵasy. «Artek» qaǵıdaty boıynsha qurylǵan bul oqý-saýyqtyrý ortalyǵynyń bólimsheleri Şýche, Shymkent jáne Qaraǵandy oblysynda da jumys isteıdi.