Balalardyń urlanǵany týraly jalǵan aqparat taratqan eki taldyqorǵandyq ustaldy
Mamyr aıynyń basynda WhatsApp messendjerinde belgisiz bireýler Taldyqorǵan mańyndaǵy kópirlerdiń biriniń astynan beti adam tanymastaı buzylǵan jasóspirimniń denesi tabylǵany týraly daýysty habarlama taratqan. Aqparat oblys ortalyǵy men aýyldarda tez tarap, jurt úreılene bastady. Osyǵan baılanysty jergilikti polıtsııa aýqymdy tekserý uıymdastyryp, bul aqparattyń jalǵan ekenin anyqtady.
«Taldyqorǵan mańyndaǵy kópirdiń asty Kóksý jáne Eskeldi aýdandarynyń aýmaǵyna qaraıdy. Polıtseıler ol jerlerdi tekserdi. Nátıjesinde, oblystyq Polıtsııa departamenti halyqty tynyshtandyrý úshin aqparattyń jalǵan ekeni týraly málimdeme jasady. Jalǵan aqparat taratý faktisi Sotqa deıingi tergeýdiń biryńǵaı tizilimine QR QK 274-baby boıynsha tirkeldi», - dep habarlady Almaty oblystyq PD baspasóz qyzmetinen.
Oblystyq krımınaldyq polıtsııa basqarmasynyń qyzmetkerleri jedel-izdestirý sharalaryn júrgizý barysynda 50-den astam adamnan jaýap alyp, WhatsApp-taǵy ondaǵan topty tekserdi. Osy arqyly eki kúdiktini - 33 jastaǵy er adam men 52 jastaǵy áıeldi ustady.
«Eki ustalýshy da Taldyqorǵan turǵyndary. Olar bir-birin tanymaıdy. Áıel qaladaǵy bazarlardyń birinde saýdamen aınalyssa, er adam jeke tasymaldaýmen aınalysady. Jaýap alý kezinde ekeýi de jalǵan aqparat taratqandaryn moıyndady. Kúdiktiler azamattardan keshirim surady», - dep atap ótti polıtsııada.
Polıtsııa jalǵan jáne senimsiz aqparat taratqandar qylmystyq jaýapqa tartylatynyn eske salyp, resmı derekkózderdiń aqparattaryn basshylyqqa alýǵa keńes beredi.
