Balalardyń temir joldardyń boıynda oınaýy apatqa ushyratady - «Lokomotıv» AQ
ASTANA. 30 qarasha. QazAqparat - Qazaqstandyq temirjolshylar temir joldarda qaýipsizdik erejelerin saqtaý qajettigi týraly eske salý úshin eldiń barlyq óńirlerinde halyq arasynda túsindirý jumystaryn júrgizip, oqý mekemelerinde kezdesýler ótkizýde.
Kezekti kezdesý 29 qarasha kúni Astanadaǵy №15 mektep-lıtseıde ótti. «Lokomotıv» AQ-nyń ókilderi balalarǵa shoıyn joldar joǵary qaýipti nysandar bolyp tabylatyndyǵyn eskertip ótti. Bul týraly kompanııanyń baspasóz qyzmetinen málim etti.
«Munda barynsha saq bolý kerek. Biraq ol týraly umytyp ketetin adamdar bar, atap aıtqanda, balalar. Olar óz ómirlerin qaterge tige otyryp, taıanyp kele jatqan poıyzdyń aldynan júgirip ótedi, vagondardyń artyna tirkelip syrǵanaıdy, bolat joldardyń ústimen júredi, bul rette, olar kóp jaǵdaıda telefonmen sóılesip nemese mýzyka tyńdap kele jatady. Balalar qozǵalys ústindegi poıyzdy toqtatý ońaı emes ekendigin este saqtaýy kerek. Qozǵalys jyldamdyǵyna, poıyzdyń salmaǵyna, joldyń profıline baılanysty toqtaý qashyqtyǵy 1000 metrdi quraýy múmkin», - dep atap ótti «Lokomotıv» AQ ekplýatatsııa basqarmasynyń bastyǵy Ashat Túsipqanov.
Basqarma bastyǵy sondaı-aq, mundaı tótenshe oqıǵalardan keıin mashınıst tereń kúızeliske túsetindigin qosyp ótti.
Balalardyń suraǵyna jaýap bere kele «Lokomotıv» AQ-nyń ókili mashınıst mamandyǵyn mamandandyrylǵan bilim berý mekemelerinde alýǵa bolatyndyǵyn, odan keıin mashınıst kómekshisi bolyp jumys istep, biliktilik kýrsynan ótý qajettigin, tek sodan keıin ǵana oǵan lokomotıvti basqarý senip tapsyrylatyndyǵyn aıtyp ótti. Ol sondaı-aq jyl saıyn eń úzdik temirjolshylarǵa salanyń basty marapaty - «Qurmetti temirjolshy» belgisi tapsyrylatyndyǵyn aıtty.
