Balalardyń tamaqtan ýlanýy: Balabaqsha talaptarǵa saı jumys júrgizbegen

«Happy minds» jekemenshik balabaqshasynda tolyǵymen tekserý jumystary 20 qyrkúıekte aıaqtalyp, naqty tekserý nátıjeleri aıtylady. Qysqasha aıtqanda, osy jyldyń 9-10 qyrkúıegi aralyǵynda balalar arasynda ishek ınfektsııasymen ýlanýdyń birneshe jaǵdaıy tirkeldi. 7-8 qyrkúıek aralyǵynda Balalar ınfektsııalyq aýrýhanasyna 8 bala kelip túsken. Olardyń qyzýy kóterilip, qusyp, táýligine 3-5 márte ishi ótip aýyrǵan», - dedi Sádýaqas Baıǵabylov.

Onyń aıtýynsha, aýrýhanaǵa túsken balalar atalǵan balabaqshanyń ártúrli tobyndaǵy 3-5 jas aralyǵyndaǵy 8 bala.

«Teksere kele balalarǵa Shigella sonnei-den kelgen dızenterııa dıagnozy qoıyldy. Qazirgi ýaqytta epıdemıologııalyq tergeý amaldary júrgizilýde. 20 qyrkúıekte jekemenshik balabaqshada naqty tamaqtan ýlaný jaǵdaıyna ne sebep bolǵany anyqtalady. Materıaldardyń bári sotqa joldanyp, tıisti sheshim qabyldanady. Balabaqsha jumysyn jalǵastyra ma, joq pa – sonda belgili bolady», - dedi ol.

Sádýaqas Baıǵabylovtyń aıtýynsha, óz bastamalary boıynsha balabaqsha jumysyn 9 qyrkúıekten bastap toqtatqan.

«Olar (balabaqsha ákimshiligi-avt) buryn bizge ruqsat berý qujatyn alý týraly ótinish bildirip kelgen bolatyn. Alaıda jalpy tıisti talaptarǵa saı bolmaǵandyqtan, olarǵa ruqsat berilmegen. Shaǵyn jáne orta bıznes nysanyn tekserýge shekteý qoıylǵandyqtan, biz ony teksere almaımyz. Tekserý úshin shaǵym túsý kerek. Sanaýly kúnderden keıin naqty tekserý nátıjesin jarııalaımyz», - dedi departament basshysy.

Eske salsaq, keshe elordalyq damytý ortalyǵynda birneshe balanyń tamaqtan ýlanyp qalǵanyn habarlanǵan bolatynbyz.

«Balalardyń ýlanýy boıynsha aıta keteıin. Biz buıryq shyǵardyq, tıisti komıssııa quryldy. Tekserý júrgizip jatyrmyz. Jumysqa qoǵamdyq densaýlyq saqtaý departamentiniń de ókilderin tarttyq. Qorytyndy boıynsha tıisti sharalar qabyldanady. Jekemenshik mektepke deıingi uıymdar jeke kásipkerlik kodeksi boıynsha jumys júrgizedi», - dedi Nur-Sultan qalalyq bilim basqarmasynyń basshysy Ánýar Janǵozın.