Balalardyń sán kórsetilimin baǵalańyz

TÓRT JASYNAN TALPYNYP JÚR

- Bul jobany biz 2014 jyldan bastap qolǵa aldyq. Alǵashqyda kıim dúkenderimen jumys jasadyq. Sol ýaqytta «Balalardy qaıdan kıindiremiz?» degen másele aldymyzdan shyqty. Sebebi balalarǵa arnalǵan sán toptamalary joqtyń qasy bolatyn. Al búginde Aıdarhan Qalıev, Maııa Jumanbekova, Dınara Chakarova, Zarına Akshýlakova syndy maıtalmandar jáne Samidel, ILATI, Vesta, Glasman, KaroMeli, LOGOVO sán úıleri balalarǵa arnap kıim úlgilerin usyna bastady, - dep sán kórsetiliminiń bas prodıýseri, belgili jýrnalıst Mahabbat Esen áńgimesin bastady.

Birinshi jyly shoýǵa 70-ke jýyq bala qatysty. Qazirgi tańda jobaǵa qatysýǵa nıet bildirgenderdiń qarasy kóbeıdi. Osy jyly 318 baladan 111-in iriktep aldy. Jobaǵa tórt jastan bastap, on alty jasqa deıingi balalar qatysady. «Mańyzdysy - árkimniń atalmysh sharaǵa óz qulqymen kelýinde» deıdi jobanyń kreatıv prodıýseri, kastıng dırektory Juldyz Seısenbekova. Iá, kórsetilimge joldama alǵan kúnnen bastap bala jaýapkershilikti sezinedi. Jaı ǵana sahnaǵa shyǵyp, oıyn kórsetemin degen oı bolmaıdy. «Kids Fashion Show» balalardy kishkentaıynan jan-jaqty bolýǵa jeteleıdi. Kerek bolsa, suraqtarǵa jaýap berip, ózin ár qyrynan tanytýǵa daıyn bolady. Bala sahnaǵa shyqqan kezde belgili bir obrazǵa enip, teatrlandyrylǵan qoıylym qoıady. Sondaı-aq, bı bılep, 20 metrlik sán sherýinen ótip úlgeredi. Árıne, nómirdi tastaı etip jasaý úshin kásibı mamandardyń kómegi qajet, sol sebepti balalarmen eki aı boıy jumys júredi. Osy tusta bári balanyń eńbegine baılanysty ekenin túsiný qajet. Eger bala qalamasa, áke-sheshe onyń sheshimine áser ete almaıdy.

- Bir qýantarlyǵy, ár jyl saıyn er balalar jobamyzǵa kóptep qatysyp jatyr. Búginde uldardan 40 qatysýshymyz bar. Kóbi bul jobany ýaqytsha múmkindik dep qabyldamaıtynyn baıqaýǵa bolady. Alǵan bilimderin ári qaraı jalǵastyryp, dıplomatııalyq mektebimizge jazylady. Boıyndaǵy senimdilikti arttyryp, oqý úlgerimin jaqsartady. Ýaqyttyń qadirin túsinedi, - deıdi Juldyz.

KASTINGTE TAŃǴALDYRÝDAN TARTYNBAIDY

Balalar kastıngten súrinbeı ótý úshin tańqaldyrýdan jalyqpaıdy. Osy joly irikteýge bir qyz qaǵazdan jasalǵan kóılekti kıip kelgen eken. Keıbir jaǵdaıda qatysýshylar kúmánmen keledi, qazylar alqasyna suraq qoıýdan taıynbaıdy. «Qoıylymnyń maǵan berer paıdasy qandaı?» degen saýal kókeılerinde júredi.

«Ekinshi talap - túr-álpettiń kelisýi» deıdi uıymdastyrýshylar. «Balanyń aty bala. Qatty árlemeı-aq, jalt-jult etken kıimdi kıgizbeı-aq bala boıyndaǵy jalyndy kórsetýge bolady. Bizdiń maqsatymyz da soǵan saıady. Tek qana balalarǵa emes, kásibı mamandarǵa da talap qatań. Úzdikterdi tańdap aldyq. Máselen, «KaroMeli» atty sán úıi balalardyń kıim-kesheginen bastap, aıaq-kıimine deıin tigedi. Al Aıdarhan esimdi jigit otandyq jún men kashemırmen jumys isteıdi» dep sózin sabaqtady Juldyz.

SAHNA JІGER BEREDІ

Balalar kıimimen bári túsinikti bolǵan sııaqty. Endi bı jaǵyna kim jaýapty? Daıyndyq barysyn óz kózimizben kórý úshin stýdııaǵa bettedik. Táp-tátti balalar horeografpen birge bılep jatqannyń ústinen tústik. Árkim ustazdarynyń aıtqan nusqaýlyǵyn, jasaǵan qımyldaryn barynsha aınytpaı qaıtalaýǵa tyrysyp jatyr. Ár qımyldy balaǵa oıyn arqyly jetkizip jatqanyn baıqadyq. «Narul, sen tıgrdi sal», «...Endi kólik aıdaǵandaı bol» degen sózder estilip jatty.

Balany bıge úıretýdiń óz ereksheligi baryn horeograf jasyrmady. Bı muǵalimi Tursynaı Erkenbaeva jetistikke jetýdiń joly - balaǵa senim bildirý deıdi. Ómirge jańa qadam basqandarǵa «Qolyńnan barlyǵy keledi!» degen sóz kádimgideı jiger beretin bolyp shyqty.

Kishkentaılar baryn salyp, bı bılep jatqan kezde, bólmeniń ar jaǵynda olardyń áke-sheshesin kórdik. Solardyń biri - alty jasar Ersultannyń anasy Aqtotymen áńgimelesýdiń sáti tústi. «Bul jobaǵa biz alǵash ret qatysyp otyrmyz. Biz úshin osynaý shara úlken jańalyq deýge bolady» dep bastady ol. - Ulym úsh jasynan bastap barlyq úıirmelerge úıir: bı bılep, án aıtady, sportpen aınalysady. Munyń barlyǵy balamnyń damýyna oń áser etetinine senemin. Ol birden «Mama, teledıdardan kóringim keledi» dedi. Aıtqanyna qulaq astym. Bul joba bala armanynyń oryndalýyna sep bolaryna senemin. Jobada basqa da balalarmen tanysyp, qoǵam belsendisine aınalyp jatyr. Keıbireýleri besikten beli shyqpaǵan balany tanymaldyqqa áýestendirme dep sógýi múmkin. Alaıda balamyz óz ýaqytyn tıimdi ótkizedi, tabıǵatynan uqypty, tárbıeli. Berip jatqan múmkindiktiń de suraýy baryn biledi. Ákesi de temirdeı tártiptiń adamy» dep qaıyrdy sózin jas ana.

Iá, «bolar bala - besikten» deıdi qazaq. «Kazakhstan Kids Fashion Show» jobasy kóptegen búldirshinderdiń juldyzyn jandyrǵany talaı ret dáleldendi. Ul-qyzdardyń daýystaryn radıodan estip, júzderin jarnamalyq bılbordtan kórgen bolarsyz. Bunyń barlyǵy bala eńbegin paıdalanyp, qarjy jınaqtaý maqsatynda emestigin Mahabbat basa aıtty. Ózi de 7 jasarlyq uldy tárbıelep otyrǵan ana. «Ideıany áý bastan-aq balam úshin júzege asyrdym. Ol meniń barlyq bastamalaryma atsalysyp, basy-qasymda júredi» dep aǵynan jaryldy ol.

Bıylǵy shoý Táýelsizdigimizdiń 25 jyldyǵyna arnalyp, «Qazaqstanda jasalǵan» uranymen ótedi.