Balalardyń múddesin qorǵaıtyn memlekettik baǵdarlama kerek - Zaǵıpa Bálıeva
ASTANA. QazAqparat - Qazaqstanda balalardyń múddesin qorǵaıtyn memlekettik baǵdarlama qajet. Bul jaıynda májilismen Zaǵıpa Bálıevanyń elimizdiń Premer-Mınıstri Baqytjan Saǵyntaevtyń atyna joldaǵan depýtattyq saýalynda aıtyldy, dep habarlaıdy QazAqparat.
«Qazaqstandaǵy balalar quqyǵy jónindegi ýákil retinde Sizdiń nazaryńyzdy Qazaqstanda balalar múddesin qorǵaıtyn memlekettik baǵdarlamanyń joq ekendigine aýdarǵym keledi. Adam quqyqtarynyń jalpyǵa ortaq deklaratsııasyna sáıkes balalardyń aıryqsha qorǵanys pen kómekke quqyqtary bar. Qazaqstan Respýblıkasynyń Konstıtýtsııasy otbasy, ana men balaǵa memlekettik qoldaý kórsetýge kepildik beredi», - dedi ol.
Depýtattyń aıtýynsha, Qazaqstanda sábıler ólimi tómendegenmen, onyń kórsetkishi áli de joǵary qalyp otyr. Balalar arasynda túrli aýrýlarǵa, múgedektikke shaldyǵý derekteri de jıileı túsýde. Sońǵy 5 jylda oqýshylardyń syrqattanýy 22 paıyzǵa artyp, múgedek balalardyń sany 81,5 myńǵa jetip otyr.
«Qaraýsyz qalǵan balalardyń da sany artýda. Jasóspirimder arasyndaǵy qylmystyń kórsetkishi de ózekti kúıinde qalyp otyr. Jyl saıyn elimizde otbasynan jáne balalardy tárbıeleıtin mekemelerden 200 bala qashyp ketedi. Tárbıesi qıyn balalardy arnaıy mekemege ákelý derekteri de arta túsýde. Qazirgi jetimderdiń basym bóligin ata-analary tastap ketken», - dedi depýtat.
Májilismenniń dereginshe, 7 000 balany memleket óz qamqorlyǵyna alǵan.
«2016 jyly 2 999 baladan ata-anasy bas tartsa, 817 balany ata-anasy tastap ketken. 2017 jyldyń 10 aıynda 1 740 balaǵa qylmystyq áreket qoldanylǵan. Onyń ishinde 248 bala jynystyq zorlyq-zombylyqqa ushyraǵan. Al 311 bala aıýandyqpen óltirilgen. Bul derekterdiń artynda taǵdyry tálkekke ushyraǵan jastarymyzdyń ómiri tur. Menińshe, balalardyń múddesin qorǵaıtyn memlekettik baǵdarlama daıyndaıtyn ýaqyt jetti. Baqytjan Ábdiruly, sizdiń nazaryńyzdy Balalardyń múddesin qorǵaıtyn memlekettik baǵdarlama ázirleý isine aýdarǵym keledi», - dedi Zaǵıpa Bálıeva.
