Balalardyń mektepke qaýipsiz jáne yńǵaıly tasymaldanýyn qamtamasyz etý qajet - QR BǴM
ASTANA. QazAqparat - «Mektepke jol» respýblıkalyq qaıyrymdylyq aktsııasyn ótkizý aıasynda balalardy mektepke qaýipsiz jáne yńǵaıly tasymaldaýǵa erekshe kóńil bólý qajet, dep málim etti OKQ brıfınginde QR Bilim jáne ǵylym mınıstrliginiń Balalardyń quqyqtaryn qorǵaý komıteti tóraǵasynyń orynbasary Mánshúk Ábdikárim.
«Jańa oqý jylynyń qarsańynda atalmysh aktsııany uıymdastyrý aıasynda biz mektepteri joq aýyldardaǵy balalardyń bilim alýǵa degen qoljetimdiligi máselesin sheshý maqsatynda, oqýshylardy qaýipsiz ári yńǵaıly tasymaldaý sharalaryn uıymdastyrý isine nazar aýdarǵandy jón kórip otyrmyz», - dedi M.Ábdikárim. Onyń málimetinshe, respýblıkada mektepteri joq 30 myń mektep jasyndaǵy oqýshylary bar 1 626 eldi meken bar, dep habarlaıdy primeminister.kz. «1 maýsymǵa deıin 27 590 oqýshynyń tasymaly uıymdastyryldy, olardyń 24 myńy kúndelikti tasymaldaýmen qamtamasyz etilip, 3 myńnan astam bala mektep janyndaǵy lagerlerde turyp keldi. Qalǵan balalar mektepke ózderi kelip júrdi», - dep málimdedi beıindi vedomstvonyń ókili. Tóraǵa orynbasary balalardy mektepke qaýipsiz tasymaldaýdy qamtamasyz etýge qoldaý kórsetýge jergilikti atqarýshy organdar qosylǵanyn aıtyp ótti. «Jańa oqý jolynda jol bala úshin qaýipsiz bolýy úshin biz ákimdikterdiń, jergilikti atqarýshy organdardyń, dırektorlardyń nazaryn aýdartamyz, olar mektep júrgizýshilerin reıs aldynda medıtsınalyq tekserýdi, avtobýstardyń tehnıkalyq jaramdylyǵyn tekserýdi uıymdastyra alatyndaı senimdi júrgizýshilermen qamtamasyz etýi tıis», - dep naqtylady ol.
