Balalardyń estý qabileti ýaqyt óte kele joǵalýy múmkin – dáriger

ALMATY. QazAqparat – Aýdıologııalyq skrınıng jańa týǵan náreste, kishkentaı balalardyń estý qabiletiniń buzylýyn der kezinde anyqtaý, múgedektikke ákeletin aýrýdy erterek emdeý jáne aldyn alý maqsatynda júrgiziledi. Bul týraly Almaty qalasy №36 qalalyq emhananyń pedıatr dárigeri Móldir Dosjan aıtty, dep habarlaıdy QazAqparat tilshisi.

Spıkerdiń aıtýynsha, jańa týǵan náresteler men 6 jasqa deıingi balalar aýdıologııalyq skrınıngten ótedi.

«Estý patologııasy balanyń damýyna teris áser etedi. Atap aıtqanda, sóıleý men til damýynyń keshigýine, áleýmettik, emotsıonaldyq jáne kommýnıkatsııalyq daǵdylardyń qalyptasýynyń buzylýyna, kognıtıvti damýdyń keshigýine jáne tómendeýine ákeletin týa bitken nemese erte estý qabiletiniń joǵalýyna ákeledi. Teris áserdiń aýyrlyǵy estý qabiletiniń buzylýynyń túri men dárejesine, estý qabiletiniń joǵalýynyń bastalý jasyna qaraı túrli bolýy múmkin.

Estý qabileti nashar balalardy estý ortasyna biriktirýdiń sáttiligi kóbine estý qabiletiniń joǵalýy qanshalyqty erte anyqtalǵanyna baılanysty. Eger túzetilmegen estý qabiletiniń joǵalýy tildi meńgerýdiń mańyzdy kezeńinde bolsa, onda balalar qabyldaý jáne ekspressıvti sóıleýdiń tereń buzylýyn, óreskel damý keshigýlerin bastan ótkerýi múmkin. Estý qabiletiniń buzylýyn der kezinde dıagnostıkalaý jáne kómek kórsetý baǵdarlamasyn bastaý estý qabiletiniń joǵalýynyń jaǵymsyz saldaryn barynsha azaıtýdyń qajetti sharty bolyp tabylady», - dedi dáriger.

Ol estý qabileti buzylǵan balalardyń shamamen jartysynda estý qabiletiniń joǵalýy men kereńdiktiń damýy úshin aıqyn qaýip faktory joq ekenin aıtty. Estý qabiletiniń joǵalýy ata-ana men mamandardyń nazaryn aýdarmaı, birte-birte paıda bolýy múmkin. Bul neonataldy kezeńnen bastap balalardy jappaı tekserý qajet ekenin kórsetedi.

Jańa týǵan nárestege arnalǵan aýdıologııalyq skrınıngtiń birinshi kezeńi ómiriniń alǵashqy 24-72 saǵatynda júzege asyrylady. Ekinshi kezeńi bala 3 aı, 1 jas, 2 jas, 3 jas, 6 jasqa jetkende júrgiziledi.