Balalardyń durys tamaqtanýy máselesin tıisti deńgeıde kótergen jón - professor O. Ospanov
ASTANA. QazAqparat - Balalar semizdigine jol bermes úshin ata-analar fastfýdter júıesinen bas tartýǵa nazar aýdarý tıis. Bul týraly búgin Ortalyq kommýnıkatsııalar qyzmetindegi baspasóz máslıhatynda belgili hırýrg, professor Oral Ospanov málim etti.
Onyń sózine qaraǵanda, semizdik saldarynan qant dıabeti, júrek-qantamyr aýrýlary men ózge de qaýipti ilespe dertter týyndaıdy. Sondyqtan da eńbek qabilettiligi men densaýlyǵyn joǵaltqan kóptegen adamdar úshin hırýrgııalyq jolmen emdeý tıimdirek bolady.
«Alaıda, kóp jaǵdaılarda salaýatty ómir saltyn nasıhattaý sharalary tıimsiz júrgiziledi. Sondyqtan durys tamaqtanýdyń mán-jaıyn adamǵa jastaıynan túsindirgen mańyzdy. Búginde kóptegen elderde sekildi bizde de adamdardyń kóbisinde artyq salmaq pen semizdiktiń belgileri bar», - dedi hırýrg.
Onyń paıymynsha, salaýatty ómir saltyn balabaqshadan bastap túsindirip, balalardyń durys tamaqtanýyna nazar aýdarý qajet. Bul turǵyda jetkinshekterdiń oqytýshylary men tárbıeshiler de osy baǵytta bilimderin jetildirýi kerek.
«Biz kúndelikti ómirde jumystyń qarbalas bolǵandyǵynan, durys tamaqtanýǵa ýaqyt bólýge mán bermeımiz. Eresekterge qaraǵanda balalar arasyndaǵy semizdiktiń qarqyny jyldamyraq. Bul óte úlken problema jáne osy másele tıisti deńgeıde kóterilip júrgen joq. Meniń oıymsha, balalyq shaqtan bastap tamaqtaný mádenıetin ózgertý kerek. Ata-analary fastfýdter júıesinen bas tartýǵa nazar aýdarýdy eskerýi tıis. Árıne, sonymen qatar osy baǵytta bizdegi pedagogtardyń de tıisti daıarlyǵy bolǵany jón», - dedi O. Ospanov.
