Balalardyń densaýlyǵy men damýyna zardabyn tıgizetin aqparattan qorǵaýǵa qatysty zań jobasy bizdiń qoǵam úshin óte qajetti zań bolmaq
ASTANA. 5 qyrkúıek. QazAqparat - «Zań jobasynyń ózindik ereksheligi mol jáne bizdiń qoǵam úshin óte qajetti zań bolmaq. Internet resýrstary boıynsha máseleler týyndaıdy. Ǵalamtorda taratylǵan materıaldarǵa shekteý qoıý, zııandy aqparattardan balalardy qorǵaý óte kúrdeli»,- «Balalardyń densaýlyǵyna jáne damýyna zardabyn tıgizetin aqparattan qorǵaý týraly» zań jobasyna bastamashylyq jasaǵan depýtattardyń biri Gúlmıra Isimbaeva osylaı dedi.
Balalardyń kompıýter arqyly vırtýaldy kisi ólimin, azaptaý, qorlaý, jábirleý áreketterin kórýi halyqty da alańdatyp otyrǵan máseleniń biri ekeni anyq. Sonymen qatar balalarǵa arnalǵan baspa óniminde, dybys, kıno jáne beıneónimderde balanyń densaýlyǵy men damýyna zııan keltiretin aqparat bolmaýy tıis. Bilim berý mekemelerinde balalardy oqytýǵa arnalǵan aqparattyq ónimniń mazmuny osy Zańnyń talaptaryna sáıkes kelýi shart. Shákirtterge arnalǵan dápterlerdi, kúndelikterdi, kitap tystaryn, kitap belgilerin, mektepter men mektepke deıingi balalar mekemelerinde paıdalanylatyn ózge de polıgrafııalyq ónimderdi bezendirý jas synyptamasy kategorııalaryna laıyq bolýy tıis.
Búgin ótken jumys toby otyrysynan keıin jýrnalısterge suhbat bergen depýtat Gúlmıra Isimbaeva: «Balalardyń densaýlyǵyna men damýyna zardabyn tıgizetin aqparattan qorǵaýǵa qatysty mundaı zań jobasy elimizde birinshi ret ázirlenip otyr. Árıne, birinshi ret bolyp otyrǵandyqtan ony ómirsheń etip shyǵarý jolynda qıyndyqtar týyndaıtyny anyq. Balalardyń densaýlyǵyna men damýyna zardabyn tıgizetin aqparattan qorǵaýǵa qatysty problemamen qaı ýákiletti organ aınalysatyny qıyn máseleniń biri bolyp otyr. Óıtkeni aqparatty taratý quqyǵy ár túrli salalardyń ıeliginde. Ony zań boıynsha retteý máselesimen birqatar mınıstrlikter men vedomstvolar aınalysady»,- dedi.
