Balalardyń bilimine ınvestıtsııa salý qajet - Baýyrjan Baıbek
NUR-SULTAN. QazAqparat - Almaty qalasynyń ákimi Baýyrjan Baıbek máslıhat depýtattarymen jınalys ótkizip, bıylǵy jylǵy qala bıýdjetin bólýge qatysty esep berdi.
Qala basshysy bilim sapasyn arttyrý úshin júrgizilip jatqan jumystar jaıynda aıtty, dep habarlaıdy QazAqparat tilshisi.
«Balalardyń bilimine ınvestıtsııa salý qajet. Jaqsy oqyǵandardyń barlyǵy da grantqa oqýǵa túsedi. Eger ata-analary kóńil aýdaratyn bolsa, onda balalar da jaqsy oqıtyn bolady. Bul rette sapaly bilim berý de asa mańyzdy. Qalaǵa keletin adamdardyń sany jyl saıyn artyp kele jatyr. Soǵan baılanysty bıýdjetke jáne birqatar áleýmettik ınfraqurylymǵa júkteme ulǵaıady. Almatyda bilim salasyn qalalyq bıýdjetten qarjylandyrý 5 jyldyń ishinde 20 paıyzǵa ósti. Biz árbir tıyn tıimdi bólingenin qarap otyrmyz. Úsh jyldyń ishinde 12 mektep salyndy. Osy jyly 900 orynǵa arnalǵan mekteptiń qurylysy aıaqtalady», - dedi megapolıs basshysy.
Sonymen qatar Baýyrjan Baıbek qala tóńiregindegi bilim ordalarynda bala sanynyń kóptigi problemasynyń bar ekendigin ashyq aıtty.
«Qazirgi ýaqytta qala tóńiregindegi mektepterdiń lyq tolýyna qatysty ótkir problema oryn alyp otyr. Ol jaqqa kóptegen turǵyndar qonys aýdarady. Sebebi ol jaqta ómir súrý ortalyqqa qaraǵanda birshama arzan. Biz Alataý men Naýryzbaı aýdandaryndaǵy №164 jáne №61 mektepterge japsarlas nysan salý úshin qarajat bólýdi josparlap qoıdyq. Bul mekteptiń tolyqqandy ǵımaraty bolady jáne bul mektep syıymdylyǵyn eki ese arttyrýǵa jáne bilim sapasyn kóterýge septigin tıgizedi degen úmittemin», - dep atap ótti qala ákimi.
Munan bólek, qala bıýdjetinen mektepke deıingi mekemelerdi aǵymdyq jóndeýge jáne qaladaǵy 17 memlekettik balabaqshanyń qaýipsizdigin qamtamasyz etýge qarajat bólý kózdelgen.
Avtory: Gúlzat Sahova
