Balalardyń arasyndaǵy sýıtsıdpen baılanysty jaǵdaı áli de alańdatady - Zaǵıpa Balıeva

ASTANA. QazAqparat - Búgin Ortalyq kommýnıkatsııalar qyzmetinde QR Parlament Májilisiniń depýtaty ári bala quqyqtary jónindegi ýákil Zaǵıpa Balıeva elimizde balalardy ınternettegi «qaýip-qaterden» qorǵaý jumystary qalaı júrgizilip jatqanyn aıtyp berdi, dep habarlaıdy «QazAqparat» HAA tilshisi.

Baspasóz máslıhaty barysynda Zaǵıpa Balıevaǵa «kók kıt» sekildi qaýipti aqparat kózderinen balalardy qorǵaý jumysy qalaı júzege asyrylyp jatqany týraly saýal qoıylǵan bolatyn.

«Mundaı saıttar (kók kıt - avt) az boldy. Biraq, boldy. Qaýipti saıttar Qazaqstannyń aýmaǵynda tirkelgen joq. Qazaqstannan tys aýmaqtan anyqtaldy. Barlyq quqyq qorǵaý organdary qaýiptiń aldyn alý baǵytynda jumys júrgizdi. Búgingi tańda elimizde ondaı saıttar joq. Qazirgi tańda daıyndalyp jatqan kıberqalqan júıesine úlken úmit artamyn. Onyń maqsaty da - osyndaı qaýipti saıttardyń pıǵylyna tosqaýyl qoıý», - deıdi Májilis depýtaty.

Zaǵıpa Balıevanyń aıtýyna qaraǵanda, mundaı saıttar óte jedel paıda bolady.

«Biraq, qazirgi ýaqytta balalardyń ózi de mundaı aqparat kózderinen ózin-ózi qalaı qorǵaý kerektigin úırenip qaldy. 111 senim telefony, «Aq saıttar tizimi» osyndaı qaýipterdiń aldyn alýǵa baǵyttalyp otyr. Balalar arasynda sýıtsıdpen baılanysty jaǵdaı áli de alańdatarlyqtaı. Sondyqtan, olardy qorǵaý úshin birqatar jobalardy qolǵa alyp, jumystardy shırata túskimiz keledi», - deıdi Zaǵıpa Balıeva.