Balalardyń 2,7 paıyzy bilim berý protsesine erekshe kózqarasty talap etedi - senator

NUR-SULTAN. QazAqparat - Senattyń Áleýmettik-mádenı damý jáne ǵylym komıtetinde Parlament depýtattarynyń bastamasymen ázirlengen «Qazaqstan Respýblıkasynyń keıbir zańnamalyq aktilerine ınklıýzıvti bilim berý máseleleri boıynsha ózgerister men tolyqtyrýlar engizý týraly» zań jobasy qaraldy, dep habarlaıdy QazAqparat.

Zań jobasynda ınklıýzıvti jáne arnaıy bilim berýdiń normatıvtik quqyqtyq bazasyn jetildirý, sondaı-aq elimizdiń zańnamasyn Adam quqyqtarynyń jalpyǵa birdeı deklaratsııasy jáne Múgedekterdiń quqyqtary týraly konventsııa qaǵıdattaryna sáıkes keltirý jónindegi mindetter sheshiletin bolady.

Osy zań qabyldanǵan kezde erekshe qajettilikteri bar balalardy oqytatyn uıymdar bilim berý baǵdarlamalaryn bilim alýshylar men tárbıelenýshilerdiń jeke damý erekshelikterine jáne áleýetti múmkindikterine sáıkes beıimdeýi tıis.

«Bizdiń elimizde erekshe bilim berý qajettilikteri bar 162 myńnan astam bala nemese balalardyń jalpy sanynyń 2,7%-y bilim berý protsesine erekshe kózqarasty talap etedi. Zań jobasy erekshe qajettilikteri bar adamdarǵa bilim berý salasyndaǵy negizgi normatıvtik-quqyqtyq akt bolyp sanalady jáne ony qabyldaý ınklıýzıvti bilim berýdi sapaly júzege asyrý úshin barlyq qajetti jaǵdaılardy jasaýǵa múmkindik beredi», - dedi komıtet hatshysy Narıman Tóreǵalıev.