Balalardy zorlyq-zombylyqtan qorǵaýdyń keshendi jospary bekitilmek

ASTANA. QazAqparat – El Úkimeti «Balalardy zorlyq-zombylyqtan qorǵaý, sýıtsıdtiń aldyn alý jáne olardyń quqyqtary qamtamasyz etý jónindegi 2023-2025 jyldarǵa arnalǵan keshendi jospardy bekitýdi usyndy.

Bul baǵytta aldaǵy ýaqytta atqarylatyn jumystardyń barysy Ashyq NQA saıtynda jarııalanǵan qujatta jazylǵan, dep habarlaıdy QazAqparat tilshisi.

«Qaýlynyń maqsaty - balalardyń qaýipsizdigin qamtamasyz etý, balalarǵa bilikti, ýaqytyly kómekti kórsetý júıesin qurý, sonymen qatar, balalarǵa qatysty zorlyq-zombylyqtyń aldyn alýǵa baǵyttalǵan keshendi qosymsha sharalar qabyldaý. Osy qaýly jobasy qabyldanǵan jaǵdaıda zańnamany engiziletin jobaǵa sáıkes keltirýdi talap etpeıdi. Keshendi jospardyń oryndalýyna jaýapty ortalyq jáne jergilikti atqarýshy organdar is-sharalardyń ýaqtyly iske asyrylýyn jáne josparda kózdelgen kórsetkishterge qol jetkizýdi qamtamasyz etsin. Olar jylyna eki ret, esepti jartyjyldyqtan keıingi 15 qańtardan jáne 15 shildeden keshiktirmeı Oqý-aǵartý mınıstrligine sharalar josparynyń oryndalý barysy týraly aqparat berip tursyn», - dep kórsetilgen qaýlyda.

Jospar boıynsha 2023-2025 jyldar aralyǵynda balalardy qorǵaýdyń basym baǵyttary:

- kámeletke tolmaǵandardyń jynystyq qol suǵylmaýshylyǵyna qarsy qylmystardyń jolyn kesý;

- kámeletke tolmaǵandardyń derbes derekterin, onyń ishinde ınternet jelilerinde qorǵaý;

- zorlyq-zombylyqtyń qurbany jáne kýágeri bolǵan kámeletke tolmaǵandarǵa qajetti kómek kórsetý jóninde qoldanystaǵy zańnamaǵa usynystar ázirleý;

- balalardyń quqyqtaryn qorǵaý salasyndaǵy ýákiletti organnyń janynan kámeletke tolmaǵandardyń isteri jáne olardyń quqyqtaryn qorǵaý jónindegi vedomstvoaralyq komıssııa qurý;

- jynystyq zorlyq-zombylyqqa ushyraǵan balalarǵa arnaýly áleýmettik qyzmetter kórsetý úshin «adam ómirlik qıyn jaǵdaıda» dep tanylýy múmkin negizderdi keńeıtý;

- kámeletke tolmaǵandardyń óz betinshe quqyq qorǵaý organdaryna júginýi úshin zańnamaǵa ózgerister men tolyqtyrýlar engizý jóninde usynystar ázirleý;

- balalardy skrınıngtik tekserýden ótkizý tártibi men kezeńdiligin ózgertý;

- kámeletke tolmaǵandardyń nemese kámeletke tolmaǵandarǵa qatysty bilim berý, densaýlyq saqtaý jáne halyqty áleýmettik qorǵaý salasy qyzmetkerleriniń ishki ister organdaryna jasaǵan quqyqqa qaıshy áreketteri týraly habarlamaǵany úshin ákimshilik jaýapkershilikti qatańdatý.

Sonymen qatar, josparǵa kınoteatrlarda jas shekteý boıynsha talaptardyń saqtalýyn baqylaýdy kúsheıtý normasy engizilgen. Munymen qosa, bıleti joq balalardy qoǵamdyq kólikten túsirýge tyıym salynady. Keshendi josparda kórsetilgen usynystardy biri - qıyn ómirlik jaǵdaıǵa tap bolǵan táýekel tobyndaǵy kámeletke tolmaǵandardyń respýblıkalyq derekqoryn qurý.

Qaýlyda jazylǵandaı, bul jumystardy iske asyrý úshin respýblıkalyq jáne jergilikti bıýdjetten qosymsha qarajat talap etilmeıdi.

Qujat 11 qarashaǵa deıin ashyq talqylaýǵa shyǵarylǵan.