Balalardy jazǵy lagerge jibergende neni eskerý qajet

NUR-SULTAN. QazAqparat - Búgingi kúni qala syrtyndaǵy 234 lager sanıtarııalyq-epıdemıologııalyq qyzmettiń baqylaýynda. Onyń ishinde jyl boıy jumys isteıtini - 18. Qalǵan 216-sy - maýsymdyq. Jyl boıy qyzmet kórsetetin uıymdar sanepıd qorytyndyny obektini paıdalaný aldynda bir ret, al maýsymdyq lagerler saýyqtyrý kezeńi bastalǵanǵa deıin alýy qajet, dep habarlaıdy QazAqparat.

Sanıtarııalyq-epıdemıologııalyq baqylaý komıtetiniń ınternet resýrsyndaǵy «Komıtet týraly-Qujattar» bólimshesinde balalardy saýyqtyrý uıymdarynyń tizbesi jarııalanǵan.

Qazirgi tańda 34 lager balalardy qabyldaýǵa daıyn.

Aldyn ala derekter boıynsha aldaǵy saýyqtyrý maýsymynda 12 lager qyzmet kórsetpeıdi.

Sanıtarııalyq-epıdemıologııalyq qorytyndy alǵan saýyqtyrý uıymdary týraly málimet aýmaqtyq bilim basqarmalaryna joldanady. Bul balalardyń ruqsaty joq lagerde demalýyna jol bermeý maqsatynda jasalady.

Komıtettiń aýmaqtyq bólimsheleri balalardyń demalýy úshin qaýipsiz oryndardy tańdaý máselesi boıynsha ata-analar arasynda túsindirý jumysyn júrgizip jatyr.

Sonymen qatar komıtet shuǵyl jeli jumysyn iske qosty. Qandaı da bir kemshilik anyqtalǵan jaǵdaıda myna nómirge júginýge bolady – 8 [phone].

Demalys oryndaryn tańdaý kezinde Densaýlyq saqtaý mınıstrligi saýyqtyrý uıymdaryndaǵy myna derekterge nazar aýdarýdy usynady:

- balalardyń turatyn orny. Balalar bólmeleri keń, jaryq, jańa nemese jańartylǵan bolýy tıis, jeke zattardy saqtaýǵa arnalǵan jaǵdaılar qarastyrylady. Bólmedegi balalar sany, terezelerdiń ashylý jaǵdaılary, bólmeni jeldetip turý múmkindikteri, tazalaý jumystarynyń júrgizilý jıiligi, jeke jýynatyn bólmelerdiń bolýy jáne onyń balalar turatyn qabatta, ıaǵnı kóp qabatty ǵımaratta nemese kottedjderge ornalasý múmkindiginiń bar-joqtyǵyna nazar aýdarýǵa keńes beremiz. Tósek-orynnyń jabdyqtaryn aýystyrý lastanýyna qaraı, biraq kúntizbe boıynsha jeti kúnnen sırek bolmaýy qajet;

- tamaqtaný (shatyrly (kıiz úı) tıpte bolsa da) tolyqqandy jáne teńgerimdi, balalar organızmine eseptelgen mólsherde bolýy tıis. Balany kúnine keminde 4-5 ret tamaqtandyrý kerek jáne túski asqa mindetti túrde ystyq tamaq beriledi. Ata-analar taǵamnyń sapasy men qaýipsizdigine senimdi bolýy kerek, sondyqtan aldyn-ala usynylǵan mázirmen tanysqan jón;

- balalar demalysyn uıymdastyrýda qaýipsizdik basty nazarda. Árqashan aýmaqtyń senimdi qorshalǵanyn, onyń kúzetiletinin (beınebaqylaý kameralarymen jabdyqtalǵan), túnde qulyppen bekitiletindigin jáne balalar ony óz betinshe asha almaıtynyn, sonymen qatar lagerge bóten adamdardyń kirýinen senimdi qorǵalǵany jaıly anyqtaý qajet. Balalar uzaq ýaqyt qaraýsyz qalmaıtynyna da kóz jetkizý mańyzdy.

Sondaı-aq, lagerde kúzet pen medıtsınalyq qyzmetkerlerdiń bolýyna nazar aýdarǵan durys.

Jaqsy kóńil-kúı men ál-aýqat qana emes, keıde balanyń densaýlyǵy da osyndaı qarapaıym nusqaýlarǵa baılanysty ekenin de umytpaǵan abzal.