Balalardy óz tárbıesine alǵan qamqorshylar týraly eski normalar qaıta qaralýy qajet - Ásııa Haırýllına
Balalardy baǵýshylardyń 90 paıyzynyń tabysy tómengi deńgeıde. Olarǵa arnalǵan arnaıy qorǵanshylyq járdemaqy kózdelmegendikten, óskeleń urpaqqa tolyqqandy kútim kórsetý, bilim jáne tárbıe berýge óz zeınetaqylary kóleminde shamasy jete bermeıdi. Bul týraly búgin Almatyda Qazaqstan qamqorshylar odaǵynyń birinshi konferentsııasynda «Shyǵarmashylyq bastamashy áıelder lıgasy» qoǵamdyq birlestiginiń prezıdenti Ásııa Haırýllına málim etti, dep habarlaıdy, QazAqparat.
«Ekonomıkalyq daǵdarys jaǵdaıynda qamqorshylyq pen qorǵanshylyqty qoldaý ózekti máselege aınalyp otyr. Sondyqtan, bizder, 28 myńnan astam qazaqstandyq balalardyń týǵan otbasynan aırylmaýyna múmkindik berip, jetim balalardyń múddeleri men quqyqtaryn qorǵaýda mańyzdy memlekettik mindet pen áleýmettik boryshtaryn ótep otyrǵan qamqorshylar men qorǵanshylardy qoldaýǵa bar kúshimizdi jumsaýymyz qajet», dedi Á. Haırýllına.
Onyń aıtýynsha: «Búgingi kúni jetim jáne ata-anasynyń qamqorlyǵynsyz qalǵan balalardy súıispenshiligine bólep, tárbıeleýdi óz jaýapkershiligine alǵan qamqorshylar arqasynda joly bolyp, balalar úıi nemese ınternatqa barmaı, týystary men jaqyndarynyń arasynda turyp jatqan osyndaı balalardyń problemalary qoǵam nazarynan tys qalǵan. «Bul sanattaǵy otbasylar qolaısyz áleýmettik-ekonomıkalyq jaǵdaıda ómir súrýde», dedi Á. Haırýllına.
Búginde, Qazaqstan qamqorshylar odaǵy búkil Qazaqstan boıynsha 1000-nan asa qamqorshylardy biriktirip otyr.
