Balalardy órtten qutqarǵan starshına Amanjol Stambekovke jeke quram aldynda alǵys bildirildi
ALMATY. 26 naýryz. QazAqparat /Ádilet Musahaev/ - Búgin «Ońtústik» óńirlik qolbasshylyǵy áskerleriniń qolbasshysy general-maıor Álıhan Jarbolov jeke quram aldynda starshına Amanjol Stambekov pen onyń zaıyby Balaıymǵa balalardy órtten qutqaryp qalǵan erligi úshin alǵys aıtty.
Tilsiz jaý aıtyp kelmeıdi. Kóktem merekesi Tarazdaǵy bir otbasy úshin qaıǵyly oqıǵamen aıaqtala jazdady. Tek áskerı qyzmetshiniń qyraǵylyǵy men oqıǵa ornyna jınalǵan azamattardyń járdeminiń arqasynda otqa oranǵan páterden úsh balany qutqaryp alýǵa múmkindik týdy.
23 naýryz kúni saǵat 15.00-der shamasynda 85395 áskerı bóliminiń kelisimshart boıynsha qyzmettegi starshınasy Amanjol Stambekov otbasymen birge úıine qaıtyp kele jatyp turǵyn úı kireberisiniń tútindep jatqanyn baıqaıdy. Oqıǵanyń sebebin anyqtamaq bolǵan ol shatyrdy tekserip, kórshilerdi aralap shyǵady. Tek 5-qabattaǵy 70-shi páterden esh jaýap bolmaıdy. Tútin de sol jerden shyǵyp jatqan eken.
Amanjol kóp oılanbastan polıtsııa qyzmetkerlerin shaqyrady da, ózi olardy kútpesten esikti buzyp kiredi. Jantalasa júrip, qonaq bólmeden edende esinen tanyp jatqan úsh balany baıqaıdy. Olar 2 men 5 jas aralyǵyndaǵy bir ul, eki qyz bala bolatyn. Der kezinde qımyldaǵan starshına otqa oranǵan úıden balalardy alyp shyǵady. Oǵan zaıyby Balaıym men qonaqta júrgen baýyry de kómek kórsetedi. Sonymen qatar, Amanjol oblystyq tótenshe jaǵdaılar departamentiniń ókilderi kelgenshe páterdegi órttiń betin qaıtaryp úlgergen.
Anyqtalǵandaı, órttiń shyǵýyna balalardyń sirińkemen oınaýy sebep bolǵan kórinedi. Kúndiz olardyń ata-analary jumysta bolǵan. Qazirgi ýaqytta zardap shekkender qalalyq balalar aýrýhanasynda em alýda. Balalardyń ómirine esh qaýip joq. Jýyrda olardyń qutqarýshylary Amanjol aýrýhanada bolyp, balalardyń qal-jaǵdaıyn bilip qaıtqan.
Qazaqstan Respýblıkasy Qarýly Kúshteriniń starshınasy Amanjol Stambekovtiń der kezindegi saýatty qımyly bolmasa búginde tilsiz jaýdyń saldaryn aıtyp jetkizý qıyn bolar edi.
Taraz garnızony áskerı qyzmetshileriniń sheshimimen órtten zardap shekken otbasyna materıaldyq kómek kórsetiletin boldy.
Starshına Amanjol Altynhanuly Stambekov buǵan deıin de erlik pen qaharmandyqtyń úlgisin kórsete bilgen azamat. Ol 1999 jyly tájik-aýǵan shekarasynda qazaqstandyq bitimgerlik batalonynda qyzmet atqarǵan. Jaýyngerlik erligi úshin birneshe medaldermen nagradtalǵan. Otbasynda úlgili áke. Eki ul, bir qyz tárbıelep ósirýde.
