Balalardy órtten qutqarǵan qostanaılyq oqýshyny Arhımed Muhambetov marapattaıdy

QOSTANAI.QazAqparat - Qostanaı mektepteriniń biriniń 5-synyp oqýshysy Oleg Pırog Qostanaı oblysynyń ákimi Arhımed Muhambetovtiń atynan marapattalady.

Bul týraly aımaq basshysy búgin Instagram paraqshasynda málimdedi, dep habarlaıdy «QazAqparat» HAA tilshisi.

«Qurmetti dostar! 25 jeltoqsanda Qostanaı qalasyndaǵy «Sadovod» saıajaıynda bolǵan oqys oqıǵa týraly bári oqyǵan shyǵar. Besinshi synyp oqýshysy Oleg Pırog órtenip jatqan úıden tórt balany aman alyp qaldy. Erteń Olegti erligi úshin alǵys aıtyp, óz qolymnan sertıfıkat pen baǵaly syılyqtar tapsyrýǵa shaqyrdym», - dedi ákim óz jazbasynda.

Sondaı-aq oblys ákimi osyndaı erjúrek, naǵyz batyrdy tárbıelegen oqýshynyń ata-anasyna alǵysyn bildirdi.

«Jaraısyń, Oleg», – dep túıindedi sózin Arhımed Muhambetov.

Esterińizge sala keteıik, Qostanaıda «Sadovod» saıajaıynda 5-synyp oqýshysy Oleg Pırog tórt balany órtten aman alyp qalǵan bolatyn.