Balalardy órtengen kólikten shyǵaryp alǵan elorda turǵyny marapattaldy
NUR-SULTAN. QazAqparat - Elorda TJD basshysynyń orynbasary Sabıt Bıtaev órt kezinde erlik kórsetken qala turǵynyn marapattady, dep habarlaıdy QazAqparat atalmysh vedomostvonyń baspasóz qyzmetine silteme jasap.
Nur-Sultan qalasynyń 55 jastaǵy turǵyny Bolat Imanbekov, TJD basshysy B.Syzdyqovtyń alǵys hatymen marapattaldy.
Esterińizde sala keteıik, 17 mamyr saǵat 11.50-de Dúkenuly kóshesinde avtokólik órtenip jatqany týraly habar kelip tústi.
Nur-Sultan qalalyq TJD órt sóndirý bólimsheleri saǵat 11.55 mınýtta oqıǵa ornyna kelip jetkende «Nissan-Terrano» markaly kóligi janyp jatqan. Órt saǵat 11.59 mınýtta aýyzdyqtalyp, saǵat 12.02 tolyqtaı sóndirildi. Órt qozǵaltqysh bóliginde elektr symdarynyń qysqa tuıyqtalýynan bolǵan. Jalyndy sóndirýge Nur-Sultan qalalyq TJD jeke quramynan 12 adam jáne eki tehnıkasy jumyldyryldy. Órt sóndirýshiler kelgenge deıin órtenip jatqan avtosalonnan kólik janynan ótip bara jatqan Bolat Imanbekov 5 jáne 6 jasar balany qutqaryp qaldy. Ol jalyn sharpyǵan avtokólikke qaraı júgirip kelgende, ishinde qalǵan eki kishkentaı balany kórgen. Kóp oılanbastan balalardy qutqarýǵa kiristi. Janyp jatqan kóliktiń terezesi ashyq bolǵan, Bolat balalardy dereý terezeden shyǵaryp aldy. Olar kólikte úlkenderdiń qaraýynsyz qalǵan. Analary dúkenge ketken.