Balalardy mektepke 6 jastan qabyldaý máselesi Parlamentte qaralýda

ASTANA. QazAqparat - Mektepke 6 jastan qabyldaý máselesi Parlament irgesinde qaralýda. Bul týraly búgin Ortalyq kommýnıkatsııalar qyzmetinde ótken brıfıngte «Nur Otan» parlamenttik fraktsııasynyń múshesi, QR Parlamenti májilisiniń depýtaty Gúlmıra Isınbaeva málim etti.

«Balany mektepke 6 jastan qabyldaý jóninde aıtar bolsaq, qazirgi tańda qoldanystaǵy Bilim týraly zańǵa sáıkes mektepke qabyldaý 6 jáne 7 jastan júrgizilip keledi. Ol ata-ananyń qalaýyna baılanysty, balanyń daıyndyǵyna baılanysty. Parlament májilisine usynylyp otyrǵan zań jobasynda 6 jastan qabyldaý kózdelip otyr. Bul ázirge joba retinde, ol qabyldanyp otyrǵan joq. Bul máseleni biz jan-jaqty qaraýymyz kerek. Bir jaǵynan qaraǵanda, 6 jas balalarǵa tym erte deýimizge bolady. Ekinshi jaǵynan qaraǵanda, ol 12 jyldyq bilim berý júıesine kóshýge baılanysty bolyp otyr. 7 jastan ary qaraı 12 jyl oqyǵan kezde balanyń jasy ulǵaıady. Bul máseleniń sheshimin ary qaraı zań jobasyn talqylaǵan kezde depýtattar mınıstrlikpen birlesip, bir sheshimge kelemiz dep otyrmyn», - dep atap ótti májilis depýtaty.

Onyń oıynsha, 6 jastan bolǵan jaǵdaıda balalardyń oqý baǵdarlamasyn aıtarlyqtaı jeńildetý kerek. «Ol jas erekshelikterine sáıkes, balanyń óziniń aqyl-oıyna, órisine, damýyna baılanysty qabyldaı alatyndaı ǵana aqparat bolýy kerek. Biz batysqa kóp silteımiz, biraq batysty 5, 4 nemese 6 jastan da qabyldaıtyn mektepter bar. Biraq olardyń baǵdarlamasy bizdiń balabaqshanyń baǵdarlamasynan da jeńil. Ol úshinshi synypqa deıin mysaly, Germanııada bala sýret salady, qaǵazdan, plastılınnen zattardy qurastyryp otyrady. Sonda balanyń jalpy damýymen aınalysady. Sondyqtan biz ol máselede mektepke 6 jastan qabyldaýǵa kóshsek, onda baǵdarlamany biz jeńildetýimiz kerek», - dep túıdi oıyn ol.