Balalardy mektep janyndaǵy lagerge emes, aýyldaǵy ata-ájesine jiberý kerek - Saparbaev
AQTÓBE. QazAqparat - Aqtóbe oblysynyń ákimi Berdibek Saparbaev mektep janyndaǵy lagerge qarsylyq bildirdi. Balalardy aldaýdy doǵaryp, olardyń eń bolmaǵanda aýyldaǵy ata-ájesine jiberýdi usyndy, dep habarlaıdy QazAqparat tilshisi.
Aqtóbe qalasynda «Ásem» lageriniń oqý ǵımaraty salynady. Jyl boıy jumys isteıtin lagerdi salý jumysyna oblys ákimi Berdibek Saparbaev qoldaý kórsetti.
«Aqtóbede jyl boıy úzdiksiz jumys isteıtin 4-5 lager bolýy kerek. Aqtóbe qalasy, Alǵa, Hromtaý, Qobda aýdandarynda ashý josparda bar. Biz balalardy demalyspen qamtydyq dep esep beremiz, biraq kóbi ótirik. Men mektep janyndaǵy lagerge qarsymyn. Bul - aldaý. Bala 9 aı boıy oqydy, sol mektepte demalý múmkin be? Ol mektepten sharshady, biz taǵy sol jerge demalýǵa mindetteımiz. Eń bolmaǵanda atasynyń aýylyna jiberińder»,- dedi Aqtóbe oblysynyń ákimi Berdibek Saparbaev.
Aıta keteıik, balalar oqý júıesin buzbaıdy. Olar aýdan, aýylda alǵan bilimin, lagerde jalǵastyra alady. Ári dos tabady, zamandastarymen tanysady.
«Aýdan ákimderi yntalýy bolýy kerek. Tabıǵaty keremet aýdandar bar, biraq ákimderi selsoq. Balalardyń demalysyn qamtamasyz etý kezinde birigý kerek»,- dedi B.Saparbaev.
Aqtóbe oblysynda 136 myńnan astam oqýshy, 400-den astam mektep bar. Oqýshylardy lagermen qamtý kezinde múmkindigi shekteýli balalar da nazardan tys qalmady. Memlekettik-jekeshelik seriktestik aıasynda Alǵa aýdanynyń Bestamaq aýylynda «Aqbóbek» lageri ashylady.
