«Balalardy «qurbandyqqa shalǵysy» kelgender ustaldy» - respýblıkalyq basylymdarǵa sholý
***
Keshe Memleket basshysy Nursultan Nazarbaev Aqordada Brazılııa, Germanııa jáne AQSh elshilerinen senim gramotalaryn qabyldady. Osyǵan oraı «Egemen Qazaqstan» gazetinde «Senim gramotalaryn qabyldady» degen taqyryppen kólemdi maqala jaryq kórdi. Basylymnyń atap ótýinshe, atalǵan elshilerden senim gramotalaryn qabyldaǵannan keıin Elbasy qysqasha sóz sóılep, elshilerdi qyzmetterimen quttyqtady. Olardyń qyzmetke kirisýi Qazaqstan Táýelsizdiginiń 20 jyldyq dúbirli merekesiniń qarsańyna sáıkes kelgendigin atap ótip, memleket tarapynan olardyń jumysynyń jemisti bolýyna, el men eldiń arasyn jaqyndastyrýyna, yntymaqty qarym-qatynasty odan ári nyǵaıtýlaryna barlyq múmkindikter jasaıtyndyǵyn atap kórsetti.
«Eýrazııalyq tutastyqtyń ozyqtyǵy, osy keńistiktegi ıntegratsııany qurýdyń ómirlik qajettigi, ortaq birlestiktiń qaǵıdattary men baǵdarlamasy týraly ıdeıany Elbasy Nursultan Nazarbaev alǵash ret 1994 jyldyń naýryz aıynda Máskeý memlekettik ýnıversıtetiniń oqytýshylary men stýdentteriniń aldynda sóılegen sózinde kótergen bolatyn. Búgingi kúni sol ıdeıa iske asyp, óziniń jemisin bere bastady», - dep jazady «Egemen Qazaqstan» gazeti. Maqalanyń tolyq nusqasyn «Eýrazııashyldyq ıdeıasy ómirge belsene enýde» degen taqyryptan oqı alasyzdar.
***
Bıylǵy jyl elimizdiń tarıhynda erekshe jyl ekeni bárimizge málim. Qazaqstandyqtar barshamyzdyń basy qundylyǵymyz bolyp otyrǵan memleketimiz táýelsizdiginiń 20 jyldyǵyn atap ótedi. Onyń ústine ústimizdegi jyly Qazaqstan Respýblıkasynyń Parlamenti qazaq eliniń memlekettik táýelsizdiginiń 20 jyldyǵy deklaratsııasyn qabyldaǵaly otyr. Osyǵan baılanysty «Aıqyn» gazeti atalǵan qujatty ázirlep jatqan arnaıy jumys tobynyń múshesi, Senat depýtaty Ádil Ahmetovti suhbatqa tartqan. Ekeýara áńgime basylymnyń sársenbilik sanynda «20 jyldyqtyń deklaratsııasy - serpindi damýdyń negizi» degen taqyryppen berilgen.
«Aıqyn» gazetiniń jazýynsha, dúnıejúzilik boks serııasy jarysynyń jańa maýsymynyń bastalýyna eki aptadan sál ǵana astam ýaqyt qaldy. Byltyrǵy jyly AIBA-nyń bastamasymen ómirge kelgen bul shara sportsúıer qaýymnyń tarapynan zor qyzyǵýshylyqqa ıe bolyp, birden kópshiliktiń kóńilinen shyqty. Óıtkeni DBS dodasy kásipqoı men áýesqoı boksshylardyń basyn biriktirip, eki jaqqa da ortaq ereje boıynsha ótedi. Sharshy alańǵa shyqqan jigitter bas kıimsiz básekege túsedi. Bul jaıynda tolyǵyraq «Arlandar» Amerıkaǵa attanady» degen maqaladan bile alasyzdar.
***
«Shymkentte bala urlaýshylar paıda bolypty, saq bolyńdar!» degen eskertýdiń gýlep ketkeni belgili. Turǵyndar balalaryn baqshaǵa, mektepke aparýdan qorqyp qaldy. Biraq el ishindegi úreıdi kúsheıtken sybystardyń bári qur qaýeset bolyp shyqty. Ońtústiktiń polıtseıleri jurtty qorqytatyn paraqshalar taratyp lań salyp júrgenderdi ustady. Bul jaıynda «Alash aınasy» gazetiniń búgingi nómirindegi «Balalardy «qurbandyqqa shalǵysy» kelgender ustaldy» degen taqyryptaǵy maqalada keńinen baıandalǵan. Basylymnyń atap ótýinshe, «Áldekimder Qurban aıt kúni 70 balany qurbandyqqa shalady eken» degen alypqashpa áńgime Shymkentte jeldeı esip ketken edi. Sonymen qatar jýyrda Atakent aýylynda áldekim mektep mańyna «qurban aıtqa ár mektepten 15 balany baýyzdaımyz» dep jazyp ketip, úreıdi odan beter kúsheıtken. Biraq halyqtyń bereketin alǵan bul jelsózder áldebir qaskóılerdiń áńgimesi ǵana ekendigi anyqtalyp otyr.
Osy basylymnyń jazýynsha, keshe Mınıstrler kabıneti elimizdiń sot júıesi úshin asa mańyzdy qujatty qabyldady. Úkimet «Qazaqstan Respýblıkasynyń sot júıesi men sýdıalardyń mártebesi týraly» Konstıtýtsııalyq zańǵa ózgerister men tolyqtyrýlardy engizý máselesin biraýyzdan qoldap, onyń Parlament Májilisi depýtattarynyń qaraýynan sátti ótýin tiledi. «Bizde jylyna mıllıonǵa jýyq sot isteri qaralady. Al endi Joǵarǵy sot osy ister boıynsha, olardyń zańdy úkiminiń kúshine engen sot sheshimderiniń zańdylyǵyn tekserýge barlyq kezde úlgerip otyr ma, oǵan daıar ma degen máselege kelgende ýaqyttyń ózi bul máselede jergilikti oblystyq sottardyń áleýetin keńeıtý máselesin qarastyryp otyr», - dep atap ótken Joǵarǵy sot tóraǵasy B.Beknazarov.
***
«Kazahstanskaıa pravda» gazetiniń jazýynsha, Memleket basshysynyń atyna Qostanaı oblysynyń ákimi Sergeı Kýlagınnen hat keldi. Onda: «Asa qurmetti Nursultan Ábishuly! Qostanaı oblysynyń dıqandary astyq jınaý naýqanyn tabysty aıaqtady. Mol astyqtyń túsimi gektarynan 20,2 tsentnerden aınalyp, 8 mln. 681 myń tonna astyq jınaldy. Mundaı bitik astyq óńirdiń tarıhynda alǵash ret jınalyp otyr. Bul jetistik aýyl eńbekkerleriniń el Táýelsizdiginiń 20 jyldyq mereıtoıyn laıyqty qarsy alýǵa qosqan ózindik úlesi bolyp tabylady. Sizdiń qoldaýyńyz ben aıtarlyqtaı qarjylyq kómegińiz aýyl eńbekkerlerine mol astyq ósirip, rekordtyq ónim jınaýǵa múmkindikter berdi», - delingen hatta.
