Balalardy qorǵaý kúnine oraı elordada «Juldyzaı» festıvali ótedi
ASTANA. QazAqparat - Astanada balalardy qorǵaý kúnine oraı «Juldyzaı» festıvali ótedi, dep habarlady astana.gov.kz.
Ónerli balalardy qoldaý maqsatynda ótkiziletin «Juldyzaı» festıvali on jyldyń ishinde 36 myńnan astam talantty jasóspirimdi qamtyǵan. Túrli jastaǵy daryndy balalar kóptegen mádenı oıyn-saýyq sharalaryna, kórmelerge, fleshmobtarǵa, sheberlik saǵattaryna qatysyp, talaı tarıhı jáne memorıaldy keshenderdi aralady.
Aǵymdaǵy jyly 6-20 sáýir aralyǵynda ótkizilgen irikteý kezeńinde Qazaqstannyń 16 qalasynan 2000-nan astam bala óz ónerlerin ortaǵa saldy. Jalpy, 300 bala irikteý kezeńinen ótti.
Festıvaldiń ekinshi kezeńi «Astana» ulttyq art-galereıasynda uıymdastyryldy. Ádil qazylar alqasyndaǵy QR eńbek sińirgen óner qaıratkerleri, estrada juldyzdary baıqaýǵa qatysýshylarǵa ádil baǵasyn berdi. Qorytyndy shoý maýsymnyń 1 kúni «Qazaqstan» kontsert zalynda ótedi. Oǵan otandyq ártistermen qatar Reseıdiń eńbek sińirgen qaıratkeri Dıana Gýrtskaıa qatysady dep kútilýde.
