Balalardy qorǵaý kúni kishkentaı astanalyqtarǵa balmuzdaq pen shyryndar tegin taratylady
ASTANA. 31 mamyr. QazAqparat - 1 maýsymda elordanyń «Ǵashyqtar» saıabaǵynda búldirshinderge tegin balmuzdaq pen shyryndar usynylady,
dep habarlady astana.kz saıtyna qalalyq kásipkerlik jáne ónerkásip basqarmasynan.
«Bul kúni biz 4000 balmuzdaq pen 3000 tátti shyryn úlestirýdi josparlap otyrmyz. Sondaı-aq balalar úshin táttilerdiń basqa da túri tegin taratylýy múmkin», - dedi basqarma qyzmetkerleri.
Balalarǵa táttiler taratý tańerteń saǵat 10.30-da bastalady. Osy ýaqytta «Ǵashyqtar» saıabaǵynda qala búldirshinderiniń shyǵarmashyl ujymynyń qatysýymen oıyn-saýyq baǵdarlamasy usynylady.«Báıterek» ansambli, «Jaryq juldyz» bı ansambli, estradalyq ánder stýdııalary: «Astana jastyǵy», «Aqsha bulttar», «Juldyzdy sát», «Gúldáýren», «Altyn dán» horeografııalyq stýdııasy men «Baldyrǵan» halyqtyq tsırki kishkentaı kórermenderge shattyq pen kóterińki kóńil-kúı syılaıdy.
