Balalardy qorǵaý kúni qarsańynda balabaqsha tárbıelenýshilerine kitaptar syıǵa berildi

ASTANA. QazAqparat - Balalardy qorǵaý kúni qarsańynda Memlekettik tildi damytý qory Astana qalasynda jańadan ashylǵan № 76 balabaqshasynyń tárbıelenýshilerine qazaq tilindegi kitaptar pen dıskiler syıǵa tartty.

Bul - álemdik jáne qazaq klassıkteriniń eńbekteri, mektepke deıingi oqýshylarǵa arnalǵan entsıklopedııalar, tanymdyq balalar ádebıeti jáne qazaq ertegileriniń aýdıodıskileri, dep habarlaıdy Memlekettik tildi damytý qorynyń baspasóz qyzmetinen.

Sharanyń maqsaty - óskeleń urpaqtyń memlekettik tildi úırenýge degen qyzyǵýshylyǵyn arttyrý, olardy qazaqstandyq otansúıgishtikke tárbıeleý, Otanymyzǵa degen maqtanyshyn arttyrý, qazaq ádebı tilin úırenýge baýlý jáne balalardyń shyǵarmashylyq qabiletin arttyrý.

Sondaı-aq, óskeleń urpaqtyń qazaq tilin úırenýin yntalandyrý maqsatynda Qor qazaq tilin onlaın rejıminde tegin úırenýge bolatyn www.soyle.kz portalynda bıyl «Balalarǵa arnalǵan qazaq tili» bólimin ashýdy josparlap otyr.