Balalardy kıberbýllıngten qorǵaıtyn zańnamalyq sharalar qabyldaıtyn kez keldi - Prezıdent
«Adam quqyǵyn qorǵaý boıynsha jańa sharalar qabyldaý asa mańyzdy. Men úshin bul problema basymdyq sanalady. Búkil álemdegideı Qazaqstan da ınternet qýdalaýdan azamattardyń qorǵansyzdyǵymen betpe-bet kelip otyr. Birinshi kezekte munan balalar zardap shegedi. Ásirese, olar ınternet-qýdalaýdy aýyr qabyldaıdy. Ókinishke oraı bul qaıǵyly jaıttarǵa alyp keledi. Azamattardy, ásirese balalardy kıberbýllıngten qorǵaý boıynsha zańnamalyq sharalar qabyldaıtyn kez keldi. Balalardyń quqyǵyn qorǵaıtyn ózge de sharalardy kúsheıtip, habarlandyrý protsedýrasyna qatysty Balalar quqyǵy týraly konventsııanyń fakýltatıvtik hattamasyna qosylý qajet», - dedi Memleket basshysy.
QR Prezıdenti azaptaýlarmen kúres jónindegi ulttyq zańnamany jetildirý máselesi de ózekti bolyp otyrǵandyǵyna nazar aýdartty.
«Azaptaǵany úshin qylmystyq jaýapkershilikti belgileıtin bul qujatty Azaptaý, adamshylyqqa jatpaıtyn ózge de qatań is-qımylǵa qarsy halyqaralyq konventsııa erejelerine sáıkestendirý qajet», - dedi Qasym-Jomart Toqaev.
