Balalardy kıberbýllıngten qorǵaıtyn zańnamalyq mehanızmder engizildi – Toqaev
«Bıyl Parlament 150 zań jobasyn qarady. 79 zań qabyldandy. Bul qujattar konstıtýtsııalyq reformany júzege asyrýǵa baǵyttalǵan. Azamattardy áleýmettik jaǵynan qorǵaýǵa, bıznesti órkendetýge arnalǵan. Sondaı-aq, qaýipsizdikti jáne quqyqtyq tártipti qamtamasyz etýdi kózdeıdi. Atap aıtqanda, bala kútimine baılanysty tólem merzimi 1 jyldan 1,5 jylǵa deıin uzartyldy. Bul shara balalardyń da, olarǵa kútim jasaýshylardyń da áleýmettik qaýipsizdigin arttyrady. Jastar sanatynyń deńgeıi 29-dan 35 jasqa deıin ósirildi. Bul azamattardyń memlekettik qoldaý sharalaryn kóbirek alýyna múmkindik beredi. Balalardy kıberbýllıngten qorǵaıtyn zańnamalyq mehanızmder engizildi», - dedi Prezıdent.
Sondaı-aq Q.Toqaev atap ótkendeı, qaýipsizdik jáne quqyqtyq tártip salasynda da birqatar zań qabyldandy.
«Onyń ishinde bıologııalyq qaýipsizdik týraly zańdy atap ótken jón. Qylmystyq jolmen alynǵan kiristerdi zańdastyrýǵa, terrorızmdi qarjylandyrýǵa qarsy is-qımyl týraly zań da bar. Quqyq qorǵaý salasy men arnaýly memlekettik organ qyzmetkerleri jáne áskerı qyzmetshiler barynsha qorǵalatyn boldy. Sondaı-aq, olardyń jaýapkershiligi kúsheıtildi.
Qarjy pıramıdalaryna qarsy kúres salasyna, sondaı-aq qundy qaǵazdar naryǵyn, bank jáne mıkroqarjy sektorlaryn retteýge qatysty zańnama jetildirildi. Zańnamaǵa ınnovatsııany yntalandyrý, tsıfrlandyrý jáne aqparattyq qaýipsizdik máseleleri jóninde mańyzdy ózgerister engizildi. Meılinshe qolaıly bıznes-klımat qurý maqsatynda Jaqsartylǵan modeldi kelisimshart jáne Jer qoınaýyna geologııalyq zertteý júrgizý týraly kelisim sııaqty tásilder engizildi. Mıkro jáne shaǵyn kásipkerlik ókilderi úshin biryńǵaı tólem engizildi. Ol eńbekaqy tóleý qorynyń esebinen júzege asyrylady», - dedi Memleket basshysy.
Prezıdenttiń aıtýynsha, stressti aktıvterdi ekonomıkalyq aınalymǵa qaıtarý úshin zańnamalyq negiz qalyptasty.
«Saqtandyrý jáne baǵaly qaǵazdar naryǵyn, bank qyzmetin rettep, damytý úshin birqatar zańnamalyq túzetý engizildi. Alda aýqymdy jumys bar. Maqsatymyz – barshaǵa aıqyn. Bul – memleketimizdi nyǵaıtý jáne halyqtyń ál-aýqatyn arttyrý», - dedi Toqaev.
Foto: sharonselby.com
