Balalardy kıberbýllıngten qorǵaý – áleýmettik jelini jabý emes – mınıstrlik

NUR-SULTAN. QazAqparat – Aqparat jáne qoǵamdyq damý vıtse-mınıstri Danııar Qadyrov balalardy kıberbýllıngten qorǵaý týraly zań jobasyndaǵy áleýmettik jelilerdiń resmı ókildigi jaıyndaǵy normany túsindirdi, dep habarlaıdy QazAqparat.

«Qazir bizde Facebook, Instagram, Tik-Tok, VKontakte sııaqty úlken halyqaralyq ınternet-resýrstarmen jumys júrip jatyr – barlyǵy túsinistik tanytyp, kelisim berip otyr. Úlken halyqaralyq ınternet-resýrstar balany kıberbýllıngten qorǵaý qajettigin jaqsy túsinedi. Іri jelilerdiń de óz qaýipsizdik qyzmetteri bar, olar muny qadaǵalap otyrady», - dedi Danııar Qadyrov Senattyń jalpy otyrysynan keıin tilshilerge bergen suhbatynda.

Mınıstrlik ókili bul zań jobasynda repressıvti ádister joq ekenin atap ótti.

«Zań kúshine engen soń, alty aıǵa deıin ýaqyt beriledi. Ózderińiz biletindeı, telearnalardyń da ókildikteri bar. Bul da qoǵamdyq rezonans boldy, biraq birde-bir telearna jabylmady, barlyǵy jumys istep tur. Eger Qazaqstan zańdaryn buzbasa, birde-bir áleýmettik jeli buǵattalmaıdy. Bul tek osy Zań jobasymen ǵana rettelmeıdi – BAQ týraly Zań, Baılanys týraly zań bar. Jelini múldem jabý týraly eshteńe aıtylyp otyrǵan joq», - dedi D. Qadyrov.

Eske sala ketsek, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý, bilim berý, aqparat jáne aqparattandyrý máseleleri boıynsha ózgerister men tolyqtyrýlar engizý týraly» zań jobasy eki oqylymda qaraldy. Qujatqa túzetýler engizilgendikten zań jobasy Májiliske qaıtaryldy.