Balalardy emdeýge bólinetin tegin dári-dármekter tizbesi keńeıtildi

NUR-SULTAN. QazAqparat - 18 jasqa deıingi balalardy ambýlatorııalyq deńgeıde tegin dári-dármekpen qamtamasyz etý tizbesine 192 ataý engizildi. Bul týraly búgin QR Densaýlyq saqtaý mınıstrligi Dári-dármekpen qamtamasyz etý jáne standarttaý departamenti dırektorynyń mindetin atqarýshy Aleksandr Kostıýk aıtty, dep habarlaıdy QazAqparat tilshisi.

Onyń atap ótýinshe, mindetti áleýmettik medıtsınalyq saqtandyrý (MÁMS) júıesi aıasynda MÁMS júıesine qatysýshy patsıentter 62 aýrý boıynsha tegin dári-dármekpen qamtamasyz etiledi.

«Sonymen qatar patsıentterdi ınfektsııalyq, protozoılyq jáne parazıttik aýrýlar, gelmıntozdar, grıbokty ınfektsııalar, as qorytý, qan júıeleriniń, aǵzalardyń aýrýlary jáne ımmýndyq mehanızmge áser etetin jekelegen buzylýlar, júıke júıesi, kórý, estý jáne tynys alý aǵzalarynyń, teri jáne teriasty kletchatkasynyń, nesep-jynys júıesi, súıek-bulshyq et júıesi jáne tinderdiń aýrýlary, sondaı-aq júrek-qan tamyry aýrýlary kezinde tegin dári-dármekpen qamtamasyz etý josparlanýda», - dedi Aleksandr Kostıýk.

Ol úshin QR DSM buıryǵymen bekitiletin dári-dármekpen qamtamasyz etýge arnalǵan preparattar tizimi MÁMS júıesi aıasynda biryńǵaı dıstrıbýtsııa júıesi arqyly satyp alynatyn 225 ataýǵa keńeıtiledi. Olardyń 161 ataýy eresek patsıentterdi, 192 ataýy balalardy emdeýge arnalǵan.

Al «SQ-Farmatsııa» JShS Basqarma tóraǵasynyń mindetin atqarýshy Berik Sháriptiń aıtýynsha, 157 jańa ataý, onyń ishinde anaǵurlym jıi qoldanylatyn qyzýdy túsiretin jáne qabynýǵa qarsy quraldar sııaqty dári-dármekter, sondaı-aq antıbıotıkter qazirgi ýaqytta satyp alynǵan.

«Preparattar biryńǵaı dıstrıbıýtordyń qoımalaryna kelip tústi, jóneltilýge daıyn. Biryńǵaı dıstrıbıýtor tiziminde engizilgen ózgerister kúshine engennen keıin taǵy 82 pozıtsııa satyp alynady», - dedi ol.