Balalardy dinı qyzmetke zańsyz tartýdan qorǵaý kúsheıtiledi

ASTANA. QazAqparat - Óńirlik dinı birlestikterdi tirkeý úshin talaptar jeńildetiledi. Búgin Parlament Májilisiniń jalpy otyrysynda dinı qyzmet jáne dinı birlestikter máseleleri boıynsha zań jobasyn talqylaý kezinde QR Din isteri jáne azamattyq qoǵam mınıstri Darhan Káletaev osylaı málim etti, dep habarlaıdy QazAqparat tilshisi.

«Zań jobasyna sáıkes, óńirlik dinı birlestikti qurý úshin bir oblystan eki nemese odan kóp jergilikti birlestikter ókilderiniń qatysýy jetkilikti bolady. Dinı qyzmet salasyndaǵy jaýapkershilikti qarastyratyn Ákimshilik kodekstiń normalaryna balama ákimshilik jazalaý retinde alǵashqy ret «eskertýdi» qoldaný engizilýde (ÁtQB 490 b.). Atap aıtqanda, 9 quqyqbuzýshylyq túri boıynsha aldymen eskertý jarııalanady», - dep atap ótti Darhan Káletaev.

Budan bólek, zańnamaǵa dinge kózqarasyna qaramastan azamattardyń, sonyń ishinde dinge senýshiler men senbeıtinderdiń teń quqyǵyn qamtamasyz etý boıynsha normalardy engizý usynylady.  Muny Qazaqstannyń halyqaralyq-quqyqtyq mindettemeleri talap etedi.

Mınıstrdiń sózine qaraǵanda, bul másele boıynsha eskertýdi Birikken Ulttar Uıymynyń Adam quqyqtary jónindegi komıteti bergen bolatyn. Búgingi tańda shamamen 14,5 paıyz qazaqstandyq ózderin ateıster nemese agnostıkter retinde kórsetip otyr. Olardyń quqyqtary dinge senýshilerdiń quqyqtary qorǵalatyn deńgeıde qorǵalýy tıis. Sondyqtan, salalyq zańnyń 3-babyna tıisti túzetýler engizildi.

«Kámeletke tolmaǵandardy dinı qyzmetke zańsyz tartýdan qorǵaý deńgeıi kúsheıedi. Balalar men jasóspirimderdi ata-analarynyń nemese zańdy ókilderiniń kelisiminsiz salttar men joralarǵa tartpaýdy normatıvtik turǵyda bekitý usynylady», - dedi vedomstvo basshysy.

Budan buryn habarlanǵandaı, jalpy otyrysta palata depýtattary «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.