Balalardyń jazǵy demalysynda ishki týrızm men otbasylyq saıahattardy damytýǵa basymdyq beriledi
ASTANA. KAZINFORM - Úkimet otyrysynda balalardyń jazǵy demalysyn uıymdastyrý máseleleri qaralyp, Týrızm jáne sport mınıstri Erbol Myrzabosynov balalar-jasóspirimder týrızmin damytýǵa baǵyttalǵan jobalardy tanystyrdy, dep habarlaıdy QR týrızm jáne sport mınıstrliginiń baspasóz qyzmeti.
Jazǵy kezeńde balalardyń qaýipsiz ári mazmundy demalysyn uıymdastyrý, otbasylyq saıahattardy qoldaý jáne ishki týrızmdi damytý negizgi baǵyttardyń biri retinde aıqyndaldy.
Osy maqsatta elimizde balalar men ata-analarǵa arnalǵan sporttyq, mádenı jáne týrıstik is-sharalar uıymdastyrylady. Solardyń biri – «Býrabaı-2026» jartasqa órmeleý respýblıkalyq festıvali.
2026 jylǵa arnalǵan oqıǵalar kúntizbesi aıasynda jazda balalar men jastarǵa arnalǵan 20-dan astam iri is-shara ótkizý josparlanǵan. Maýsym aıynda Almaty oblysynda «NomadFest», Qaraǵandy oblysynda «Balkhash Tour Fest» jáne Ulytaý oblysynda «Kókmaısa» festıvalderi ótedi.
Shilde aıynda Astanada «Asyl Mura» mádenı-otbasylyq is-sharasy, Jetisý oblysynda «Alakól tolqyny» jastar jobasy jáne Atyraý oblysynda ekologııalyq «Lotos festıvali» uıymdastyrylady.
Tamyz aıynda halyqaralyq «Comic Con Astana» festıvali ótedi. Sonymen qatar Almaty oblysynda «Baıserke aspany» otbasylyq avıatsııalyq festıvali jáne basqa da mádenı-sporttyq is-sharalar uıymdastyrylady.
Balalar-jasóspirimder týrızmin damytý aıasynda Kids Go Free baǵdarlamasy jalǵasady. Baǵdarlama balalardyń áýe bıletterin sýbsıdııalaýǵa baǵyttalǵan. Baǵdarlama iske qosylǵaly beri 7 myńnan astam bala tegin áýe saparyna shyqqan. Bıyl taǵy 2 myńǵa jýyq bala osy múmkindikti paıdalana alady.
Balalardyń kanıkýl kezindegi belsendi demalysyn qamtamasyz etý úshin Aqmola oblysyndaǵy «Parýs», Shyǵys Qazaqstan oblysyndaǵy «Sarybel» jáne Abaı oblysyndaǵy Alakól demalys aımaqtarynda saýyqtyrý-sporttyq lagerler uıymdastyrylady.
Qabyldanyp jatqan sharalar balalardyń jazǵy demalysyn qaýipsiz ári mazmundy ótkizýge, olardyń eldiń mádenı-týrıstik áleýetimen tanysýyna jáne otbasylyq demalysty damytýǵa múmkindik beredi.
Osyǵan deıin balalardyń jazǵy demalysyn jaqsy uıymdastyrǵan óńirler týrly jazdyq.
