Balalardyń jazǵy demalysyn uıymdastyrý: Respýblıkalyq shtab quryldy
ASTANA. KAZINFORM - Oqý-aǵartý mınıstrligi balalar demalatyn lagerlerdiń jumysyna qatysty túsinik berdi.
- Qazaqstan – balalardyń jazǵy demalysyn uıymdastyratyn sanaýly memleketterdiń biri. Lagerlerde 3,1 mln balany, onyń ishinde áleýmettik osal toptaǵy 500 myńnan astam balany qamtý josparlanǵan. Sondaı-aq, «Qazaqstan halqyna» qory esebinen «Jazdyq joldama» jobasy aıasynda 10 myń balany qabyldaý eskerilgen, - delingen mınıstrliktiń Kazinform agenttigine bergen jaýabynda.
Jalpy, qazir barlyq lagerlerge birdeı talap qoıyldy. Jazǵy demalysty uıymdastyrý maqsatynda Oqý-aǵartý mınıstrligi 9 memlekettik organmen kelisilgen jazǵy demalysty uıymdastyrý jónindegi birlesken is-sharalar josparyn (2024-2026 jyldarǵa arnalǵan) ázirlep qabyldady. Іs-sharalar josparyna sáıkes, Oqý-aǵartý, Densaýlyq saqtaý, Іshki ister, Tótenshe jaǵdaı, Mádenıet jáne aqparat, Týrızm jáne sport mınıstrlikteri óz quzyreti aıasynda jazǵy demalysty uıymdastyrý jáne balalardyń qaýipsizdigin qamtamasyz etý máselelerin úılestiredi.
- Balalardyń jazǵy demalysyn uıymdastyrý boıynsha Respýblıkalyq shtab jáne óńirlik vedomstvoaralyq shtabtar quryldy. Bıylǵy jazda jumysyn bastaýdy josparlap otyrǵan balalar saýyqtyrý ortalyqtarynyń tizbesi jasaldy. Lagerlerdiń sanıtarlyq normalarǵa, azyq-túlik qaýipsizdigine, sýdaǵy, ormandaǵy, sport obektilerindegi qaýipsizdikke sáıkestigin baqylaý kúsheıtildi. Balalardyń demalysyn sapaly uıymdastyrý úshin oblystar, Astana jáne Almaty qalalary ákimderiniń orynbasarlary jazǵy demalysty uıymdastyrý jónindegi óńirlik josparlardy bekitti. Onyń aldyndaǵy oryn alǵan jaǵdaılardy eskere otyryp, bıylǵy jazǵy demalysty erekshe daıyndyqtarmen ótkizý - óńirlik bilim basqarmalarynyń aldynda turǵan basty mindetterdiń biri. Sanıtarlyq-epıdemıologııalyq ruqsattama almaǵan lagerlerdiń jumysyna ruqsat berilmeıdi, - dep atalyp ótken vedomstvo aqparatynda.
Bul rette, jazǵy demalysty uıymdastyrý men ótkizý, sondaı-aq balalardyń qaýipsizdigin qamtamasyz etý úshin derbes jaýapkershilik jergilikti atqarýshy organdarǵa júkteldi.
Atap aıtqanda, osy jyly 16 jyl boıy jumys istegen 189 maýsymdyq, tamaǵy bar jáne tamaqsyz 10 myńnan astam mektep janyndaǵy, 512 shatyrly jáne kıiz úı lagerlerin kezeń-kezeńimen ashý josparlanǵan.
Budan buryn habarlanǵandaı, elordada 210 myńnan astam oqýshy jazǵy demalys kezinde lagerine barady.
Bıyl Qazaqstan boıynsha 3 908 450 bala oqý jylyn aıaqtaıdy.