Balalardyń jańa «oıyny»: Petropavldyqtar kóligin aýlaǵa qaldyrýǵa qorqatyn bolǵan

Petropavlda turǵyndar kólikterin aýlaǵa qaldyrýǵa qorqatyn bolǵan. Sońǵy kezderi qalada bireýler mashınanyń kapotyn búldirip, burandaly shege burap ketip jatyr, dep habarlaıdy Kazinform.

Áleýmettik jelide sońǵy ýaqytta kólikteriniń zaqymdanǵanyn aıtyp shaǵymdanýshylar kóbeıdi. Petropavl turǵyndarynyń aıtýynsha, bireýler aýlada turǵan kólikterdiń kapotyn tesip, burandaly shege burap ketetin bolǵan. Búginde zaqymdanǵan kólikter ondap sanalady. 

Kópshiliktiń pikirinshe, kólikterge burandaly shege burap júrgender balalar. Bul – olardyń jańa «oıyny» bolýy múmkin. Osydan birer jyl buryn óńirde jasóspirimder kólik dońǵalaqtarynyń nıppelin urlaýdy ádetke aınaldyrǵan bolatyn.

Soltústik Qazaqstan oblystyq Polıtsııasy departamenti baspasóz qyzmetiniń málimetinshe, áleýmettik jelide beınejazbalar júrgenimen, ázirge kóliginiń zaqymdanýyna baılanysty turǵyndardan ne shaqyrtý, ne aryz-shaǵym túspegen. Shara qoldaný úshin shaqyrtý túsýi qajet, máseleniń basyn ashqannan keıin «usaq buzaqylyq» baby boıynsha jaza qoldanylýy múmkin.