Balalardyń uıaly telefondarynyń SIM-kartalaryn tirkeý tetigi engiziledi

ASTANA. KAZINFORM — Balalardyń uıaly telefondarynyń SIM-kartalaryn tirkeý tetigi engiziledi. Bul týraly Májilis depýtattarynyń saýalyna Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıevtiń jaýabynda aıtylǵan. 

— 2026-2030 jyldarǵa arnalǵan «Qazaqstan balalary» tujyrymdamasynda balalar qaýipsizdigine baılanysty birqatar mańyzdy shara qarastyrylǵan. Onyń ishinde ınternet jelide balalardyń qaýipsiz qosylýyn qamtamasyz etetin balalardyń SIM-kartalaryn tirkeý tetigin engizý josparlanyp otyr. Mundaı SIM-kartalar Internet-trafık pen mobıldi qosymshalarǵa qoljetimdilikti shekteýge, kontentti súzgileýge, ýaqyttyq shekteýler ornatýǵa, tek aldyn ala bekitilgen kontaktilermen ǵana qarym-qatynas jasaýǵa jáne baqylaýǵa múmkindik beredi, — dedi ol vıtse-premer.

Onyń atap ótýinshe, ata-ananyń baqylaý fýnktsııasy qazirgideı óz erkimen erikti túrde emes, ata-analar úshin mindetti baqylaý retinde engiziledi.

— Ata-ana tarapynan bolatyn turaqty baqylaý fýnktsııalaryn retteý balanyń ornalasqan jerin qadaǵalap otyrýdy jáne jelidegi yqtımal qaýipti áreketterdiń aldyn alýǵa múmkindik beredi. Internet jelisinde onlaın-platformalardy, onyń ishinde oıyn platformalaryn paıdalaný kezinde balalardyń aqparattyq, psıhologııalyq jáne áleýmettik qaýipsizdigin qamtamasyz etý máseleleri Úkimettiń turaqty baqylaýynda, — dedi Jaslan Mádıev.

Aıta keteıik, Májilis depýtaty Únzıla Shapaq Roblox onlaın-platformasyn shekteýge qatysty usynys bildirgen edi.