Balalardyń tsıfrlyq derekteriniń qaýipsizdigi qalaı qamtamasyz etiledi
ASTANA. KAZINFORM – Quryltaı depýtattarynyń saýalyna jaýap bergen Premer-mınıstr Oljas Bektenov balalardyń jeke jáne tsıfrlyq derekteriniń qaýipsizdigi qalaı qamtamasyz etiletinin aıtty.
- 2026 jylǵy 9 qańtarda Qazaqstan Respýblıkasynyń Tsıfrlyq kodeksi bekitildi. Kodeks derbes derekterdiń aınalymyn, olardy paıdalanýdyń biryńǵaı standarttaryn belgileıdi. Kodekste derekterdiń quqyqtyq mártebesi, olardyń qorǵalýy jáne tsıfrlyq qatynastardy retteý qaǵıdattary aıqyndalǵan. 2026 jylǵy 24 maýsymda derbes derekterdi qorǵaýǵa qatysty Qazaqstan Respýblıkasynyń Zańy qabyldandy. Osy Kodeks pen Zańda balalardyń tsıfrlyq derekteriniń qaýipsizdik máseleleri tolyq qamtylǵan, - dedi Oljas Bektenov.
Sonymen qatar Úkimet basshysy balalar men jasóspirimderdiń tsıfrlyq ortadaǵy qaýipsizdigin qamtamasyz etý maqsatynda kıberqaýipsizdik salasyndaǵy sarapshylarmen birlesip, balalar men jasóspirimderge arnalǵan qosymsha quraldar ázirlengenin atap ótedi.
Premer-mınıstr jaýabyna qosymsha berilgen anyqtamadaǵa qaraǵanda, «Balalardy ınternette qalaı qorǵaýǵa bolady?», eresekterge «Kodty alaıaqtarǵa habarlap qoısańyz ne isteý kerek?» jadynamalary, derbes derekterdi qorǵaýǵa arnalǵan jýrnaldar ázirledi.
CyberKraft jýrnalynda ınternetti qaýipsiz paıdalaný, tsıfrlyq qaýipterdiń aldyn alý qarapaıym ári túsinikti tilde baıandalǵan. Kaspersky kompanııasymen birlesip, Kıberálippe ázirlendi. Ol ınternettegi qaýipsiz minez-qulyq qaǵıdalaryn túsindirý, kıbergıgıenanyń praktıkalyq daǵdylardy qalyptastyrady.
Bul materıaldar «eGov» elektrondyq úkimet platformasynyń «Kómek» bóliminde, Kıberálippe «Internettegi balalardyń qaýipsizdigi» bóliminde ornalastyryldy.
Aıta keteıik, elimizde onlaın-platformany paıdalanýshylardyń jasyn rastaýdyń arnaıy qaǵıdalary ázirlenedi.
