Balalardyń terezeden qulaýy alańdatady – Astana ákimdigi

ASTANA. KAZINFORM — Elordada balalardyń terezeden qulaýynyń aldyn alý jáne boldyrmaý jumystary jalǵasyp jatyr. Bul týraly elorda ákimdigi málim etti.

Tótenshe jaǵdaılar departamenti ıývenaldyq polıtsııa qyzmetkerleri, ýchaskelik ınspektorlar sondaı-aq eriktiler jumylyp, birge túsindirý jumystaryn atqardy. 

— Elordadaǵy 40-tan astam balabaqshada balalardyń terezeden qulap ketýine jol bermeý maqsatynda aqparattyq-túsindirý jáne aldyn alý sharalary júrgizilip, turmystyq qaýipsizdik boıynsha sabaqtar oıyn túrinde uıymdastyryldy. Ata-analarmen de túsindirý jumystary júrgizildi, — delingen habarlamada.

Balalardyń jaraqat alý jaǵdaılaryn azaıtýdyń negizgi qaýipsizdik erejeleri:

— úıde kishkentaı bala bolsa, terezeni ashyq qaldyrmańyz, óıtkeni bul balanyń ómirindegi sońǵy sátke aınalýy nemese ony máńgilik múgedek etýi múmkin, oǵan birneshe sekýnd jetkilikti; 

— balalardy qaraýsyz qaldyrmańyz, ásirese terezeler men shyny esikterdiń janynda oınaǵan kezde;

— tıisti tereze qorǵanysynsyz moskıt torlaryn paıdalanbańyz

— balalar oǵan súıengendi unatady, olardy senimdi tirek retinde qabyldap qulap ketýi múmkin;

— balalardyń terezeni ózdiginen ashýyna jol bermeý úshin terezelerge qaýipsizdik qulyptaryn (blokatorlardy) ornatý;

— bala terezege shyqpas úshin jıhazdy terezege jaqyn qoımańyz.

Eske sala keteıik, buǵan deıin Qyzylorda oblysynda byltyr 17 bala terezeden qulap ketkenin jazǵan bolatynbyz.