Balalardyń shyǵarmashylyq ómiri oń ózgeriske toly
ASTANA. KAZINFORM — Memleket basshysy Qasym-Jomart Toqaev balalar men jasóspirimderge arnalǵan shyǵarmashylyq úıirmelerdi memlekettik tapsyrys negizinde uıymdastyrýǵa kóńil bólgen bolatyn. Bul rette, ár óńirde shyǵarmashylyq úıirmelerdiń tamyryna qan júgirip, balalardyń ónerge, sportqa degen qyzyǵýshylyǵy arta tústi. Jýyrda Astana qalasynda «Saryarqa» ansambliniń «Biz bıleý úshin jaralǵanbyz» atty eseptik kontserti ótti.
Ansambl jetekshisi Aıymgúl Nuǵumarovanyń aıtýynsha, ansambl 2021 jyldyń qarasha aıynda qurylǵan. Az ýaqyttyń ishinde balalar respýblıkalyq jarystar bylaı tursyn, halyqaralyq óner dodalarynda júldeli oryndardy ıelengen.
«Jas jetkinshekterdiń el aldynda óner kórsetýi memleket tarapynan balalarǵa degen qamqorlyǵynyń arqasynda. Atap aıtsaq, «Damý bala» baǵdarlamasy arqyly talantty da talapty búldirshinder óz-ózin damytýǵa múmkindik aldy. Bul rette, jetekshilerdiń de, ata-analardyń da eseli eńbegin atap ótken jón. Bizdi búgin 17 jyl sahnada óner kórsetip kele jatqan temirtaýlyq «Gıýzel» úlgili bı ansambli qoldap kelip otyr. Ónerdi baǵalaıtyn barsha jandarǵa alǵysym sheksiz», — dedi ol.
Eseptik kontsert barysynda «Saryarqa» ansambliniń tárbıelenýshileri jyl boıy úırengen bılerin pash etip, áýeletip án shyrqady.
