Balalardyń onlaın-platformalarǵa tirkelýine tyıym salý úshin Eýropa tájirıbesi zerdelenip jatyr

ASTANA. KAZINFORM – Balalardyń onlaın-platformalarǵa tirkelýine tyıym salý úshin Eýropa elderiniń tájirıbesi zerdelenip jatyr. Bul týraly Májilis depýtattarynyń saýalyna Premer-mınıstrdiń orynbasary – Mádenıet jáne aqparat mınıstri Aıda Balaevanyń jaýabynda aıtylǵan.

– Memleket basshysy jarııa etken Tsıfrlandyrý jáne jasandy ıntellekt jyly aıasynda oqýshylardyń, pedagogter men ata-analardyń tsıfrlyq saýattylyǵyn arttyrý jumystary júrgizilip jatyr. Osyǵan oraı «Onlaın-platformalar jáne onlaın-jarnama máseleleri boıynsha QR-nyń keıbir aktilerine ózgerister men tolyqtyrýlar engizý týraly» jáne «Mass-medıa máseleleri boıynsha QR-nyń keıbir aktilerine ózgertýler men tolyqtyrýlar engizý týraly» zań jobalaryna usynystar ázirlenip, zań jobalaryn jarııa talqylaý júrgizildi, - dedi vıtse-premer.

Onyń atap ótýinshe, qazirgi ýaqytta zań jobalary múddeli memlekettik organdarmen kelisý kezeńinen ótip jatyr.

– Tujyrymdama aıasynda «Balalardy densaýlyǵy men damýyna zııan keltiretin aqparattardan qorǵaý týraly» zań normalary zııandy ınternet-kontentterdi retteýge basymdyq berile otyryp, ózektendiriledi. Sonymen qatar balalardy densaýlyǵy men damýyna zııan keltiretin aqparattardan qorǵaý baǵytyndaǵy halyqaralyq tájirıbe zerdelenip otyr. Atap aıtqanda, Aýstralııa men Frantsııanyń balalardyń onlaın-platformalarǵa tirkelýine tyıym salý tájirıbesi zerdelenip jatyr. Atalǵan tájirıbe ulttyq zańnama erekshelikteri, tsıfrlyq damý men qoldanylatyn tehnologııalyq sheshimder eskerile otyryp pysyqtalady. Munan ary memlekettik organdarmen jáne onlaın-platformalardyń ókilderimen birge halyqaralyq tájirıbe negizinde naqty tehnıkalyq jáne uıymdastyrýshylyq tetikter kózdeledi, - dedi Aıda Balaeva.

Buǵan deıin onlaın-platforma ókildigine quqyqqa qaıshy kontentti joıý jónindegi nusqamany oryndamaǵany úshin jaýapkershilik engiziletinin jazǵan edik.