Balalardyń kórý qabileti nege nasharlap barady — oftalmolog túsindirdi
ASTANA. KAZINFORM — Elimizde kórý qabileti buzylǵan balalar sany 25 myńnan asty. Buǵan eń aldymen smartfon men planshetke uzaq ýaqyt jaqyn qashyqtyqtan qaraý áser etedi. Oftalmolog Erbol Sarymsaqov Jibek Joly telearnasynyń «Búgin LIVE» baǵdarlamasynda kózdiń kórý qabeileti jaıly egjeı-tegjeıli túsindirip berdi.
Dárigerdiń sózinshe, sońǵy jyldary balalardyń kózine túsetin salmaq aıtarlyqtaı artqan.
— Buryn kórý qabileti kóbine kitapty kóp oqıtyn balalarda tómendeıtin. Qazir kózge túsetin salmaq shamamen 80 paıyzǵa artty. Negizgi sebep televızor emes, telefon men planshet sııaqty jaqyn qashyqtyqtan qoldanylatyn gadjetter. Ásirese bul 18-19 jasqa deıingi balalardyń kórý qabiletine qatty áser etedi, — dedi Erbol Sarymsaqov.
Onyń aıtýynsha, gadjetti tolyq alyp qoıýdan góri, ony durys paıdalaný rejımin qalyptastyrý mańyzdy.
— 2 jasqa deıingi balalarǵa telefondy múlde bermeý kerek. 2-7 jas aralyǵynda ekran ýaqyty kúnine bir saǵattan aspaǵany jón. 7-14 jasta gadjetti úzilispen qoldaný qajet. Al 14 jastan keıin jarty saǵat qarap, jarty saǵat demalatyn rejımdi ustansa, kózge túsetin salmaq aıtarlyqtaı azaıady, — dedi ol.
Maman ata-analar balasynyń kórý qabileti tómendegenin erte kezeńde baıqasa, der kezinde dárigerge qaralýy keregin aıtty.
— Bala teledıdarǵa tym jaqyn otyrsa, alystaǵy zatqa qaraǵanda kózin syǵyraıtsa, kózin jıi ýqalap nemese jypylyqtatatyn bolsa, bul kórý qabiletiniń nasharlaǵanynyń belgisi bolýy múmkin. Keıbir balalar ata-anasy ursady dep qorqyp, kózi durys kórmeıtinin aıtpaı júredi. Bul oqý úlgerimine de áser etedi, — dedi oftalmolog.
Erbol Sarymsaqovtyń aıtýynsha, kóz saýlyǵyn saqtaýda kúndelikti serýendeýdiń de mańyzy zor.
— Kúnine eki saǵattan artyq taza aýada serýendeıtin balalarda kórý qabiletiniń tómendeýi 50-60 paıyzǵa sırek kezdesedi. Sebebi bul kezde bala gadjetten alystap, kózi alysqa qarap, kóz bulshyqetteri demalady, — dedi ol.
Aıta keteıik, buǵan deıin, mektepterinde oqıtyn oqýshylar arasynda mıopııa kórsetkishi 30%-ǵa jetkenin jazǵan edik.
