Balalardyń kóbi eresekterdiń qateliginen kóz jumady
ASTANA. KAZINFORM — Byltyr elimizde jol-kólik oqıǵalary saldarynan 285 bala kóz jumdy. Árbir statıstıkanyń artynda qaıǵyly taǵdyr men orny tolmas qaza tur. Bul másele týraly QR ІІM Ákimshilik polıtsııa komıtetiniń resmı ókili Aqtoty Boranova BIZDIÑ ORTA podkastynda jan-jaqty áńgimeledi.
Spıkerdiń aıtýynsha, jol apatynan qaza tapqan balalardyń shamamen 60 paıyzy jolaýshy bolǵan.
— Balalar avtokólikte eresekterdiń jibergen qatelikteriniń saldarynan qaza bolyp jatady. Kólik ishinde tasymaldaý qaǵıdalaryn saqtamaý saldarynan. Onyń ishinde qarapaıym qaýipsizdik beldigin taqpaý, balalarǵa arnalǵan avtokreslo, býster jáne adapterlerdi paıdalanbaý, — dedi Aqtoty Boranova.
Sondaı-aq qaıtys bolǵan balalardyń 40 paıyzy jaıaý júrginshi, velosıpedshi nemese samokat minýshi bolǵan.
Mamannyń sózinshe, jol-kólik oqıǵalaryna kóbine 10-14 jas aralyǵyndaǵy balalar jıi ushyraıdy.
— Bul jastaǵy balalar kóbine joldy belgilenbegen jerden kesip ótedi. Keı jaǵdaıda toqtap turǵan nemese jaqyn mańdaǵy kóliktiń aldynan júgirip shyǵyp, úlgerip ótemin dep oılaıdy. Sonymen qatar balalar ata-anasynyń áreketin qaıtalaıdy. Eger ata-ana joldy kez kelgen jerden kesip ótse, bala ony qalypty ári qaýipsiz áreket retinde qabyldaıdy. Sebebi ata-ana — bala úshin qaýipsizdiktiń basty kepili. Keıin bala jalǵyz júrgen kezde de sol áreketti qaıtalap, qaýipsiz dep esepteıdi, — dedi ol.
Aqtoty Boranova bala qaýipsizdigi árdaıym birinshi orynda turýy tıis ekenin atap ótti.
Onyń aıtýynsha, kún saıyn nebári bes mınýt ýaqyt bólip, balalarǵa joldaǵy qaýipsizdik erejelerin qarapaıym tilmen túsindirýdiń ózi olardyń sanasynda saqtalyp qalady.
— Bala kóshege shyqqan sátten bastap jol qozǵalysynyń tolyqqandy qatysýshysyna aınalady. Sondyqtan onyń qaýipsizdigine qoǵam bolyp mán berýimiz qajet. Balalar — jol qozǵalysyndaǵy eń osal qatysýshylardyń biri, — dep túıindedi spıker.
Buǵan deıin Pavlodarda balalar jol apatyna jıi ushyrap jatqanyn jazǵanbyz.
