«Jeke qaýipsizdik» sabaǵy: oqýshylardyń 95%-y oń pikir bildirdi

ASTANA. KAZINFORM — Jańa oqý jylynyń basynan bastap elimizdiń barlyq balabaqshalarynda, mektepterinde jáne kolledjderinde 1,4 mln-nan astam «Jeke qaýipsizdik» sabaǵy ótkizildi. Bul sabaqtardyń maqsaty – balalar men jasóspirimderdi qaýipsizdik erejelerin saqtaýǵa daǵdylandyrý. Bul týraly Oqý-aǵartý mınıstrligi málim etti.

Vedomstvonyń málimetinshe, sabaqtardyń tıimdiligin anyqtaý maqsatynda júrgizilgen respýblıkalyq monıtorıngke 46 myń pedagog, 318 myńnan astam oqýshy qatysqan. Onyń nátıjeleri sabaqtardyń joǵary suranysqa ıe ekenin aıǵaqtap otyr. Máselen, pedagogtardiń 92%-y mekteptegi jalpy ahýaldyń jaqsarǵanyn, 96%-y oqýshylardyń ózine degen senimdiligi artqanyn aıtty. Al oqýshylardyń 95,5%-y sabaqtardy oń baǵalasa, 90%-y olardyń kúndelikti ómirde paıdaly ekenin jetkizdi.

Jeke qaýipsizdik sabaqtary apta saıyn synyp saǵaty aıasynda 10 mınýttan ótkiziledi. Sabaqtyń mazmuny balalardyń jas ereksheligi men qabyldaý deńgeıine sáıkes ázirlengen.

Balabaqshalarda balalar shuǵyl qyzmet nómirlerin jattaıdy, qaýipsizdik erejelerimen tanysady, beıtanys adamdardan saqtaný jáne oıyn alańynda, qoǵamdyq oryndarda qaýipsizdik sharalary pen tártip saqtaýdy úırenedi.

Mektepterde kúndelikti ómir men tsıfrlyq ortadaǵy qaýipsizdikke basymdyq beriledi. Oqýshylar jeke málimetterdi qorǵaý, kıberbýllıngti tanyp, odan qorǵaný, onlaın-qarym-qatynas ornatýda qaýipterdi ajyratý, jalǵan aqparat úshin jaýapkershilikte bolý, kúdikti zattarǵa qatysty durys áreket etý, tabıǵatta, sýda jáne muzda qaýipsizdik sharalaryn saqtaý erejelerin meńgeredi.

Kolledjderde jasóspirimder men jastar arasynda jıi kezdesetin áleýmettik jáne tsıfrlyq táýekelder qarastyrylady. Olar óz quqyqtaryn qorǵaýdy, alaıaqtyqtan saqtanýdy, qaýipti onlaın tabystardan alshaq bolýdy, qoǵamdyq kóliktegi qaýipsizdikti, tótenshe jaǵdaılardyń aldyn alý jáne emotsııany basqarý daǵdylaryn meńgeredi.

— Búgingi bala eki álemde — shynaıy ómir men tsıfrlyq keńistikte qatar ósip keledi. Sondyqtan olardyń óz qaýipsizdigin bilýi óte mańyzdy. Sabaqtardyń 10 mınýttyq qysqa formatta ótkizilýi beker emes. Az-azdan, biraq jıi qaıtalanǵan aqparatty bala tez sińiredi. Bizdiń maqsat — árbir balanyń ózine senimdiligin nyǵaıtýǵa, kez kelgen jaǵdaıda ózin qorǵaýyna kómektesý, — dep atap ótti QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.

Usynylǵan oqý-ádistemelik keshen 130 sabaqty qamtıdy. Negizgi taqyryptar jylyna úsh ret qaıtalanyp, balalardyń jeke qaýipsizdik daǵdylaryn júıeli jáne turaqty meńgerýin qamtamasyz etedi.

Aıta keteıik, elimizde alǵash ret kásibı baǵdar berýge arnalǵan biryńǵaı ádistemelik nusqaýlyq ázirlendi.