Balalardyń qaýipsizdigin kúsheıtý: elde 10-nan astam zań qabyldanǵan
ASTANA. KAZINFORM — Salalyq baǵdarlama býllıng deńgeıin tómendetýge múmkindik berdi. Bul týraly búgin Quryltaıdaǵy Úkimet saǵatynda Oqý-aǵartý mınıstri Juldyz Súleımenova aıtty.
- Balalardyń jazǵy demalysyn sapaly ári qaýipsiz uıymdastyrý maqsatynda bıyldan bastap balalarǵa arnalǵan bilim berý-saýyqtyrý uıymdaryn mindetti lıtsenzııalaý júıesi engizildi. Nátıjesinde 170 uıymnyń 134-i lıtsenzııa aldy. 2026 jyly 3,3 mln bala jazǵy demalyspen jáne saýyqtyrý sharalarymen qamtyldy, - dedi J.Súleımenova.
Sonymen qatar ol balalardyń quqyqtary men qaýipsizdigin qorǵaý úshin sońǵy jyldary 11-den astam zań qabyldanǵanyn eske saldy. Zorlyq-zombylyqqa múldem tózbeýshilik qaǵıdaty bekitilip, kámeletke tolmaǵandarǵa qarsy qylmystar úshin jaýapkershilik kúsheıtildi, býllıng pen balalar quqyqtaryn buzǵany úshin ákimshilik jaýaptylyq engizildi. Óńirlik qorǵaý organdarynyń ókilettigi bekitilip, memlekettik baqylaýdyń jańa tetikteri belgilendi.
- 20 óńirinde psıhologııalyq qoldaý ortalyqtary jáne 160 otbasylardy qoldaý ortalyǵy jumys istep jatyr. Balany kásibı qabyldaýshy otbasy ınstıtýty engizildi. Nátıjesinde jetim jáne ata-anasynyń qamqorlyǵynsyz qalǵan balalardyń 82%-y otbasylyq ortada tárbıelenip keledi. Qorǵanshylyq salasyndaǵy mamandar sany 303-ten 1 029-ǵa deıin ósti. Erekshe qajettilikteri bar balalardy jeke súıemeldeý úshin «pedagog-assıstent» laýazymy engizilip, búginde 7 500 pedagog-assıstent jumys istep jatyn, - dedi mınıstr.
Sonymen birge «DosbolLike» býllıngke qarsy baǵdarlamasy býllıng deńgeıin 2,5%-ǵa tómendetýge múmkindik berdi.
- Mektepterdegi psıhologııalyq qyzmetti jańǵyrtý bastaldy. Balanyń mazasyzdyq, kúızelis, zorlyq-zombylyq, býllıng, depressııa jáne sýıtsıdtik nıet belgilerin erte anyqtaýǵa arnalǵan úsh deńgeıli biryńǵaı dıagnostıka qalyptastyryldy. Ol pedagog-psıhologter qoldanatyn 7 bastapqy, 6 tereńdetilgen jáne 7 proaktıvtik ádistemeni biriktiredi. Bekitilgen ádistemeler biryńǵaı tsıfrlyq platformaǵa biriktirildi. Taǵy bir toqtalyp ótetin másele, qazirgi kezde mektepterdiń tek 41%-ynda pedagog-psıhologterge arnalǵan jabdyqtalǵan jeke kabınetter bar, - dedi vedomstvo basshysy.
Memleket basshysynyń tapsyrmasymen elimizdiń 20 óńirde balalardyń quqyqtaryn qorǵaý basqarmalary qurylyp, onda shamamen 200 maman jumys istep jatyr. Sondaı-aq árbir 5 myń balaǵa keminde bir maman normatıvi engizilip, óńirlerdiń ınstıtýtsıonaldyq múmkindigi kúsheıtildi.
Jańa basqarmalar óńirlerde negizgi úılestirýshi organ bolýy úshin bıylǵy shilde aıynda Bala quqyqtary jónindegi ýákilmen jáne ıÝNISEF-pen birlesip, barlyq maman biliktiligin arttyrdy. Sala mamandaryn júıeli daıarlaý úshin bıyl 292 bilim berý granty bólindi.
Buǵan deıin habarlanǵandaı, mektepterdegi beınebaqylaý júıesine jasandy ıntellektini engizý bastaldy.