Balalardyń qaýipsizdigi: jospardan tys tekserýge qalaı ótinish berýge bolady

ASTANA. KAZINFORM — Qazaqstanda balalardyń quqyqtary men qaýipsizdigin qamtamasyz etý maqsatynda bilim berý mekemelerinde jańa baqylaý júıesi engizildi. 

Jańa tártipke sáıkes, jospardan tys tekserýler aldyn ala eskertýsiz júrgiziledi, biraq tek naqty faktiler men dálelder bolǵan jaǵdaıda ǵana bastalady. Bul týraly Ortalyq kommýnıkatsııalar qyzmetinde ótken brıfıngte QR Oqý-aǵartý mınıstrligi Balalardyń quqyqtaryn qorǵaý komıteti tóraǵasynyń orynbasary ıÝlııa Ovechkına habarlady.

Erekshe baqylaýǵa shamamen 15 myńǵa jýyq bilim berý uıymy kiredi. Oǵan balabaqshalar, mektepter, ınternattar, stýdenttik jataqhanalar, medıtsınalyq-áleýmettik mekemeler men balalar úıleri jatady. Jańa tártip balalardyń naqty ómiri men qaýipsizdigin baqylaýǵa, sondaı-aq mekeme basshylarynyń jaýapkershiligin arttyrýǵa baǵyttalǵan.

— Tekserý úshin anonımdi ótinishter negiz bola almaıdy, al balalardyń quqyqtarynyń buzylýyna kýá bolǵan azamattar e-Otinish portaly arqyly resmı ótinish bere alady. Osy ótinish negizinde ǵana jospardan tys tekserý bastalady. Jańa tártip jazalaý úshin emes, balalarǵa qaýip tónbeýin qadaǵalaý, táýekelderdi ýaqtyly anyqtaý jáne mekeme basshylarynyń jaýapkershiligin arttyrý úshin engizildi, — dedi ıÝlııa Ovechkına.

Osylaısha, ata-analar men azamattar quqyq buzýshylyqty baıqasa, portal arqyly shaǵym berip, balalar mekemelerinde naqty tekserýdiń bastalýyna sebep bola alady. Al josparly tekserýlerdiń tizimi jyl saıyn avtomatty túrde qalyptasyp, komıtettiń resmı saıtynda jarııalanady.

Aıta keteıik, balalardyń qaýipsizdigin baqylaý úshin jasandy ıntellekt tehnologııalary engiziletini týraly jazǵan edik.